“कोण रोहित पवार?”, प्रणिती शिंदेंच्या वक्तव्यानंतर रोहित पवारांची प्रतिक्रिया; म्हणाले, “कदाचित…”

प्रणिती शिंदे काय म्हणाल्या?

रोहित पवारांच्या विधानाबद्दल विचारलं असता प्रणिती शिंदे म्हणाल्या की, “कोण रोहित पवार? त्यांची आमदारकीची पहिली टर्म आहे. अजून ते मॅच्युअर नाहीत, त्यांना वेळ द्या. काही लोकांत पोरकटपणा असतो,” असं प्रणिती शिंदेंनी म्हटलं होतं.

हेही वाचा : “मंत्रीपद मिळाल्यावर ९ दारूची दुकानं उघडली, अन् समोर गतिरोधक बसवून…”, अजित पवारांचा भुमरेंना खोचक टोला

यावर आज ( ११ फेब्रवारी) रोहित पवारांनी भाष्य केलं आहे. टीव्ही ९ मराठीशी बोलताना रोहित पवारांनी सांगितलं, “प्रणिती शिंदे या मोठ्या बहिणीसारख्या आहेत. मी जमिनीवर राहणारा साधा कार्यकर्ता आहे, म्हणून मला कदाचित त्या ओळखत नसतील. विषय ओळखण्याचा आणि न ओळखण्याचा नाही. प्रणिती शिंदे या अनुभवी आमदार आहेत. त्यामुळे त्या बोलून गेल्या; त्यांना तो अधिकारही आहे.”

“कार्यकर्त्यांना विनंती एवढीच की, एकमेंकात भांडण करण्यापेक्षा आपला विरोधी पक्ष हा भाजपा आहे. तसेच, बेरोजगारी हा सर्वात महत्वाचा प्रश्न आहे,” असं आवाहन रोहित पवारांनी केलं आहे.

हेही वाचा : “…म्हणून देवेंद्र फडणवीसांबरोबर एकत्र कारने प्रवास केला”, पंकजा मुंडेंनी दिलं स्पष्टीकरण

“सोलापूरला गेल्यावर राष्ट्रवादीचे कार्यकर्ते आणि पदाधिकाऱ्यांनी मांडलेली भूमिका माध्यमांसमोर व्यक्त केली. सोलापूर लोकसभेची जागा, कोणाला मिळेल, याचा निर्णय पक्षाचे प्रमुख घेतील. पण, पक्षाच्या नेत्यांनी निर्णय घेताना छोट्या छोट्या कार्यकर्त्यांना विश्वासात घ्यावं. मग तो निर्णय काँग्रेस किंवा राष्ट्रवादीच्या बाजूने असेल,” असं रोहित पवारांनी सांगितलं.