मल्याळम सुपरस्टार अभिनेता मोहनलाल लवकरच भाजपामध्ये प्रवेश करणार असल्याच्या चर्चेला राजकीय वर्तुळात उधान आले आहे. सोमवारी सुपरस्टार मोहनाल यांनी सोमवारी पंतप्रधान नरेंद्र मोदी यांची भेट घेतली. पंतप्रधान नरेंद्र मोदी आणि मोहनलाल दोघांनीही कालच्या भेटीची ट्विटरवरून माहिती दिली. त्यानंतर राजकीय चर्चांना उधाण आले असून मोहनलाल हे भाजपामध्ये जाण्याची शक्यता राजकीय सूत्रांकडून वर्तवली जात आहे.

आगामी लोकसभा निवडणुकीची भाजपाने तयारी सुरू केली आहे. या निवडणुकीत घवघवीत यश मिळावे यासाठी भाजपाकडून सर्वस्वी प्रयत्न सुरू आहेत. मोहनलाल यांनी भाजपामध्ये प्रवेश केल्यास केरळमध्ये नक्कीच कमळ फुलेल. राजकीय सुत्रांच्या अंदाजानुसार जर मोहनलाल यांनी भाजपामध्ये प्रवेश केल्यास त्यांना काँग्रेस नेते शशी थरूर यांच्या विरोधात तिरुवनंतपूरच्या लोकसभा मतदारसंघातून तिकीट देवू शकते.

केरळमध्ये कमळ फुलवण्यासाठी भाजपा आधीपासूनच प्रयत्न करत आहे. याआधी क्रिकेटर श्रीसंतने भाजपाकडून निवडणूक लढवली होती. गेल्या विधानसभा निवडणुकीत भाजपला एका जागेवर विजय मिळण्यात यश आले होते. तसेच मतांच्या टक्केवारीत सुधारणा झाली होती. सुत्रांच्या वृत्तानुसार, भाजपाचे माजी प्रदेशाध्यक्ष के. राजशेखर यांची राज्यपाल म्हणून नियुक्ती झाल्याने त्यांचा वारसदार म्हणूनही मोहनलाल यांच्याकडे पाहिले जात आहे.