‘आदिपुरुष’च नाही या सिनेमांवरुनही झाला आहे गदारोळ, वादाचं ग्रहण लागलेले ‘हे’ पाच चित्रपट कुठले?

पठाण सिनेमाच्या रिलिज आधी वाद

शाहरुख खान आणि दीपिका पदुकोण यांचा पठाण सिनेमा प्रदर्शित होण्याआधी प्रचंड वाद झाला होता. या सिनेमातल्या दीपिकाच्या भगव्या बिकिनीवरुन हा वाद निर्माण झाला होता. मात्र सिनेमा रिलिज झाल्यानंतर जो वाद झाला त्याचा सिनेमाला प्रचंड फायदा झाला. सिनेमाला बंपर ओपनिंगही मिळालं आणि त्या सिनेमाने चांगली कमाईही केली. शाहरुख खानला अनेक दिवसांपासून एका हिटची गरज होती तो या रुपाने त्याला मिळाला.

द केरला स्टोरी

द केरला स्टोरी या सिनेमावरुन खूप वाद झाला होता. सिनेमात विशिष्ट धर्माच्या भावना दुखावल्या गेल्याचा आणि हा सिनेमा प्रपोगंडा मूव्ही असल्याचाही प्रचार झाला होता. मात्र अत्यंत कमी बजेटमध्ये तयार करण्यात आलेल्या या सिनेमाने बॉक्स ऑफिसवर दोनशे कोटींचा व्यवसाय केला.

डर्टी पिक्चर

विद्या बालन, नसीरुद्दीन शाह, इम्रान हाश्मी यांचा डर्टी पिक्चर हा सिनेमा सिल्क स्मिताच्या आयुष्यावर आधारित होता. या सिनेमावर अश्लीलता पसरवण्याचा आरोप झाला होता. या सिनेमावरुनही खूपच वाद निर्माण झाला होता. मात्र या सिनेमाने खूप चांगली कमाई केली. या सिनेमाला ओपनिंगही चांगलं मिळालं. तसंच या सिनेमामुळे विद्या बालनच्या करिअरचा ग्राफही उंचावला.

बँडिट क्वीन

१९९४ मध्ये बँडिक क्वीन हा सिनेमा प्रदर्शित झाला होता. फुलन देवीच्या आयुष्यावर हा सिनेमा होता. मात्र हा सिनेमा प्रदर्शित झाल्यानंतर काही दिवसांतच चित्रपटगृहांतून हटवण्यात आला. या सिनेमात फूलन देवीच्या बलात्काराचं चित्रण करण्यात आलं होतं. तसंच ठाकूर समाजाच्या हत्येचंही दृश्य होतं. या प्रकरणी फूलन देवीने सिनेमावर बंदी घालण्याची मागणी केली होती. त्यानंतर हा सिनेमा चित्रपटगृहातून उतरवण्यात आला होता.

परझानिया

२००५ मध्ये परझानिया नावाचा सिनेमा प्रदर्शित झाला होता. हा सिनेमा गुजरातच्या दंगलीवर आधारीत होता. या सिनेमात गुजरात दंग्यांवेळी जे काही घडलं ते बीभत्सपणे दाखवण्यात आलं असा आरोप झाला होता. या सिनेमावर राजकीय पक्षांनी विरोध केला होता तसंच धार्मिक संघटनांनी या सिनेमाला विरोध केला. त्यानंतर या सिनेमावर बंदी घालण्यात आली.