कंडक्टर म्हणून काम केलेल्या ‘त्या’ बस डेपोला रजनीकांत यांनी दिली भेट; कर्मचाऱ्यांशी मारल्या गप्पा

नुकतंच BMTC म्हणजेच Bengaluru Metropolitan Transport Corporation या बस डेपोमध्ये रजनीकांत यांनी हजेरी लावली. तिथे काम करणाऱ्या कोणत्याही कर्मचाऱ्याला याबद्दल जराही कल्पना नव्हती. रजनीकांत यांच्या या सरप्राइज भेटीमुळे सगळेच भारावून गेले. रजनीकांत यांनी चित्रपटात येण्याआधी बऱ्याच ठिकाणी पडेल ते काम केलं. कुली म्हणून तसेच तांदळाची पोती उचलण्याचं कामही त्यांनी केलं.

आणखी वाचा : ‘गदर’साठी सनी देओल नव्हे तर गोविंदा होता दिग्दर्शकाची पसंती? अनिल शर्मा यांनी सांगितलं नेमकं सत्य

यानंतर त्यांनी ‘बंगलोर ट्रान्सपोर्ट सर्विस’मध्ये कंडक्टरची नोकरीही केली. नुकतंच त्यांनी या डेपोच्या परिसरात कोणालाच काही कल्पना न देता हजेरी लावली. बस ड्रायव्हर तसेच कंडक्टर यांच्याशी त्यांनी मनमोकळ्या गप्पा मारल्या अन् इतर सहकाऱ्यांसह फोटोसुद्धा काढले. रजनीकांत यांना बस डेपोमध्ये पाहून इतरही लोकांनी तिथे तुडुंब गर्दी केली. रजनीकांत यांनी प्रत्येकाशी संवाद साधला अन् सगळ्यांबरोबर फोटोही काढले.

मराठी कुटुंबात जन्मलेल्या रजनीकांत यांनी साऱ्या जगाला स्वतःच्या अभिनयाची दखल घ्यायला लावली. रजनीकांत जेव्हा कंडक्टरची नोकरी करत होते तेव्हा त्यांच्या एका सहकारी बस ड्रायव्हरने त्यांना अभिनयात नशीब अजमावण्यासाठी प्रेरित केलं. राज बहादूर हे त्या बस ड्रायव्हरचं नाव होतं आणि त्यांच्यामुळेच रजनीकांत यांचा अभिनय क्षेत्रातील प्रवास सुरू झाला.