कॅन्सरचं चुकीचं निदान, अभिनेत्रीने पैज लावून डॉक्टरांकडून घेतले ५ रुपये; सुई टोचली अन् शरीरात पसरला कर्करोग, सुचवली ‘ही’ चाचणी

नफीसा यांना २०१८ मध्ये पहिल्यांदा कर्करोग झाल्याचे निदान झाले होते, तेव्हाची आठवण त्यांनी सांगितली. “मला माहित होतं की माझ्या शरीरात काहीतरी गडबड आहे. मी गोव्यात दररोज चालायचे, पण अचानक मला असामान्य थकवा जाणवू लागला. तेव्हा मला समजलं की ही काहीतरी किरकोळ गोष्ट नाहीये,” असं द क्विंटला दिलेल्या मुलाखतीत नफीसा म्हणाल्या.

नफीसा नंतर अनेक डॉक्टरांना भेटल्या, पण सर्व डॉक्टरांनी हा गंभीर आजार नसल्याचं सांगितलं. काहींनी तर अँटीबायोटिक्स लिहून दिले होते. “मी पुन्हा रेडिओलॉजिस्टकडे गेले आणि त्यांना माझे स्कॅन पुन्हा तपासण्याची विनंती केली. मी रडत म्हणाले, ‘मला माहित आहे की काहीतरी गडबड आहे,” असं नफीसा यांनी सांगितलं.

नफीसा यांनी डॉक्टरांशी लावलेली पैज

अखेर डॉक्टरांनी नफीसा यांना क्षयरोग आहे, असं निदान केलं. पण त्यांना विश्वास बसला नाही. मग त्यांनी पीईटी स्कॅन करायला सांगितलं. त्यापूर्वी मस्करीत त्यांनी डॉक्टरांबरोबर पैज लावली. नफीसा म्हणाल्या, “रिपोर्ट्स पाहिल्यावर डॉक्टरांकडे बोलायला काहीच नव्हतं. मी त्यांच्याबरोबर पैज लावली होती की मला टीबी नाही. पैज जिंकल्याने मी त्यांच्याकडून प्रत्येकी ५ रुपये घेतले. रिपोर्ट्स पाहून त्यांना दुःख झालं, पण मी यावर मात करेन, असं त्यांना म्हणाले.”

…अन् कर्करोग शरीरात पसरला

कॅन्सरचे चुकीचे निदान आणि गोंधळाचा नफीसावर खोलवर परिणाम झाला. मग त्यांनी कर्करोगाविषयी जागरूकता करायचं ठरवलं. “कॅन्सर मार्कर चाचण्या उपलब्ध आहेत, त्याबद्दल तुमच्या डॉक्टरांना विचारा. उगाच पैसे खर्च करू नका. योग्यरित्या न केल्यास बायोप्सी ही सर्वात वाईट गोष्टींपैकी एक आहे. कारण ज्या क्षणी डॉक्टरांनी ट्यूमरला सुई टोचली, त्याच क्षणी कर्करोग पसरला आणि मी कॅन्सरच्या तिसऱ्या स्टेजला पोहोचले,” असं त्या म्हणाल्या.

नफीसा यांनी सुचवली १२०० रुपयांची चाचणी

नफीसा यांनी CA 125 चाचणीवर भर दिला. या चाचणीसाठी १२०० रुपये खर्च येतो, ही चाचणी कर्करोग लवकर शोधण्यास मदत करू शकते. “कोणीही मला ती चाचणी सुचवली नाही. त्याऐवजी, त्यांनी मला २५ हजार रुपयांच्या PET स्कॅनसाठी पाठवलं. म्हणूनच मी आता त्याबद्दल सार्वजनिकपणे बोलते. जर शरीरात काहितरी गडबड आहे, असं वाटत असेल तर त्यांनी या मार्कर चाचण्यांचा आग्रह धरला पाहिजे. माझ्यासारखे मूर्ख बनू नका,” असं त्यांनी स्पष्ट शब्दांत सांगितलं.

कॅन्सर शरीरात पसरलाय हे डॉक्टरांनी सांगितलं, त्याबद्दल नफीसा म्हणाल्या, “मी हसले. डॉक्टरांनी मला सांगितलं की उशीर झाल्यामुळे कॅन्सर पसरला आहे. मी म्हणाले, ‘ठीक आहे, मी लढेन.’ तेव्हा मी तिसऱ्या टप्प्यात होते आणि आता चौथ्या टप्प्यात आहे,” असं नफीसा म्हणाल्या.

“माझ्या पहिल्या केमोथेरपीनंतर १२ दिवसांनी जेव्हा मी माझ्या केसांमधून हात फिरवला, तेव्हा खूप केस हातात आले. त्यावेळी मी कॅन्सर आहे हे स्वीकारलं. मी रडत म्हणाले, ‘मला आता खरंच कॅन्सर आहे.'”

तिसऱ्या टप्प्यातील कर्करोगाशी झुंज दिल्यानंतर सात वर्षांनी, नफीसा यांना पोटात पसरलेल्या चौथ्या स्टेजमधील कर्करोगाचे निदान झाले. “मी नुकतीच ऑस्ट्रेलियाहून परतले होते. तीन वर्षांपूर्वी पुन्हा एकदा कर्करोग झाल्याचं आढळलं. उपचार केले, पण नियमित पीईटी स्कॅननंतर डॉक्टरांनी सांगितले की हा चौथ्या स्टेजचा आहे, त्यामुळे तो बरा होऊ शकत नाही. डॉक्टरांनी केमोथेरपी सुचवली,” असं नफीसा म्हणाल्या.

नफीसा केमोथेरपीबद्दल म्हणाल्या, “ही एक अतिशय विषारी प्रक्रिया आहे. मला ती अजिबात आवडत नाही. पण मला ती करावी लागते. मी माझ्या शरीराशी बोलते आणि त्याला प्रवासाचा आनंद घेण्यास सांगते. कर्करोग पूर्णपणे नष्ट करायला सांगते. कर्करोग हा कुणासाठीही आनंददायी नाही.”

नफीसा यांनी १९७९ साली ‘जुनून’ चित्रपटातून इंडस्ट्रीत पदार्पण केलं होतं. त्या शेवटच्या अमिताभ बच्चन यांच्याबरोबर ‘उंचाई’ मध्ये झळकल्या होत्या.