मराठमोळा दिग्दर्शक ओम राऊत यांच्या बहुप्रतीक्षित आणि बहुचर्चित ‘आदिपुरुष’ या चित्रपटाची सध्या चांगलीच चर्चा आहे. या चित्रपटात अभिनेता प्रभास प्रभू श्रीरामांची भूमिका साकारणार आहे. ‘आदिपुरुष’च्या ट्रेलरला प्रेक्षकांनी भरभरून प्रतिसाद दिला. ट्रेलरनंतर आता या चित्रपटातील पहिले गाणे रिलीज करण्यात आले आहे. चित्रपटाच्या गाण्यातून श्रीरामाच्या भक्तीचा जागर करण्यात येत असून रिलीज झाल्यावर या गाण्याने नवा रेकॉर्ड केला आहे.
‘जय श्री राम राजा राम’ या ‘आदिपुरुष’ चित्रपटातील पहिल्या गाण्याला प्रेक्षकांनी भरभरून प्रतिसाद दिला आहे. हे गाणे अजय-अतुल यांनी संगीतबद्ध केले असून या गाण्याचे गीतकार मनोज शुक्ला आहेत. ‘जय श्री राम’ या गाण्याच्या व्हिडीओला रिलीज झाल्यापासून अवघ्या २४ तासांमध्ये सर्वाधिक व्ह्यूज मिळाले आहेत. ‘जय श्री राम’ गाण्याचा व्हिडीओ एका दिवसात यूट्यूबवर सर्वाधिक पाहिलेला व्हिडीओ बनला आहे. आकडेवारीनुसार, ‘आदिपुरुष’च्या पहिल्या गाण्याला २ करोड ६२ लाख ९१ हजार २३७ व्ह्यूज आणि ४ लाख ८४ हजार १८६ लाईक्स मिळाले आहेत. हा नवा रेकॉर्ड करीत ‘आदिपुरुष’ने अक्षय कुमारच्या ‘क्या लोग तुम’ या गाण्याला मागे टाकले आहे.
हेही वाचा : सैफच्या लेकाचे बॉलिवूडमध्ये पदार्पण, सारा अली खान खुलासा करीत म्हणाली…
मुंबईमध्ये अनोख्या पद्धतीने पहिले गाणे रिलीज करता यावे यासाठी ‘आदिपुरुष’च्या टीमने विशेष तयारी केली होती. अजय-अतुल यांच्यासह ३० जणांच्या कोरस टीमने लाइव्ह परफॉर्म केल्यावर हे गाणे लॉंच करण्यात आले. दिग्दर्शक ओम राऊत, भूषण कुमार यांच्याबरोबर अजय-अतुल यांनी मोठ्या भक्तिभावाने ‘जय श्री राम’ गाणे बनवले आहे, असे या कार्यक्रमादरम्यान सांगण्यात आले.
दरम्यान, ‘आदिपुरुष’ चित्रपटात अभिनेता प्रभास हा प्रभू श्रीरामांच्या भूमिकेत दिसणार आहे, तर अभिनेत्री क्रिती सेनॉन सीतेच्या भूमिकेत दिसेल. मराठमोळा अभिनेता देवदत्त नागे या चित्रपटात हनुमानाची भूमिका साकारणार आहे. १६ जून रोजी हा चित्रपट प्रेक्षकांच्या भेटीला येणार आहे.
