बॉलीवूड अभिनेता आदित्य रॉय कपूरने यापूर्वी लंडन ड्रीम्स, ॲक्शन रिप्लाय, गुजारिश अशा अनेक चित्रपटांमध्ये काम केले आहे. मात्र, अभिनेता ‘आशिकी २’ चित्रपटामुळे रातोरात स्टार झाला. सध्या आदित्य कपूर त्याच्या ‘द नाइट मॅनेजर’ या सीरिजमुळे चांगलाच चर्चेत आहे.
श्रद्धा कपूर आणि आदित्य रॉय कपूर यांचा ‘आशिकी २’ चित्रपट बॉक्स ऑफिसवर सुपरहिट ठरल्यामुळे टी-सीरिज आणि विशेष फिल्म्सने अलीकडेच ‘आशिकी ३’ चित्रपटाची घोषणा केली. ‘आशिकी ३’ चित्रपटाच्या दिग्दर्शनाची जबाबदारी अनुराग बसू यांच्याकडे सोपवण्यात आली असून यामध्ये कार्तिक आर्यन मुख्य भूमिका साकारणार आहे. दरम्यान, ‘द नाइट मॅनेजर’ सीरिजच्या पत्रकार परिषदेत आदित्य रॉय कपूरला ‘आशिकी ३’मध्ये तू काम करणार का? याबद्दल विचारण्यात आले.
हेही वाचा : करण जोहरने मागितली आलिया भट्टची माफी; पोस्ट शेअर करत म्हणाला, “‘तुम क्या मिले’ गाण्याचे शूटिंग करताना…”
‘आशिकी २’ मध्ये आदित्यने राहुल जयकरची भूमिका साकारली होती. पत्रकार परिषदेत आदित्य हसत उत्तर देत म्हणाला, मला वाटत नाही की मी ‘आशिकी ३’ मध्ये असेन कारण, ‘आशिकी २’च्या क्लायमॅक्समध्ये राहुल जयकर आत्महत्या करतो असे दाखवण्यात आले होते. मला अनेकांनी तू तिसऱ्या भागात काम करणार का? असे विचारले आहे आणि मला सुद्धा काम करण्याची इच्छा आहे परंतु, ते शक्य नाही.
आदित्य रॉय कपूर पुढे म्हणाला, “जेवढ्या गोष्टी मी ऐकल्या आहेत त्यावरून असे समजते की, ‘आशिकी ३ ‘साठी निर्माते खूप चांगली टीम बनवत आहेत. एक प्रेक्षक म्हणून मला ‘आशिकी ३’ पाहायला नक्की आवडेल.” यावेळी दिग्गज अभिनेते अनिल कपूर यांनी आदित्यचा माइक खेचून घेत सांगितले, “‘आशिकी ४’ निर्माते माझ्याबरोबर बनवत आहेत.”
दरम्यान, ‘द नाइट मॅनेजर’ सीरिजचा पहिला भाग १७ फेब्रुवारीला प्रदर्शित झाला होता. या सीरिजचा दुसरा भाग ३० जूनला डिस्ने प्लस हॉटस्टार या ओटीटी प्लॅटफॉर्मवर प्रदर्शित होणार आहे.
