सध्या बॉलिवूड अभिनेत्यांना मराठी चित्रपटांची भुरळ पडली असून, बऱ्याच महापुरुषांच्या भूमिका येत्या काळात बॉलिवूड कलाकार साकारताना दिसणार आहेत. मध्यंतरी महेश मांजरेकर यांच्या आगामी ‘वेडात मराठे वीर दौडले सात’ या चित्रपटातील अक्षय कुमारचा छत्रपती शिवाजी महाराजांच्या भूमिकेतील लुक चांगलाच व्हायरल झाला होता. नुकतंच या चित्रपटाचं चित्रीकरणही सुरू झालं असून प्रेक्षक अक्षय कुमारला महाराजांच्या भूमिकेत पाहण्यास फारच उत्सुक आहेत.
याबरोबरच ‘सॅम बहादुर’सारख्या ताकदीच्या भूमिका पेलणारा विकी कौशलही लवकरच लक्ष्मण उतेकर यांच्या आगामी ‘छावा’ या चित्रपटात झळकणार आहे. या चित्रपटात विकी कौशल छत्रपती संभाजी महाराज यांची भूमिका साकारणार आहे. विकीचा या चित्रपटासाठीचा लुकची सध्या चांगलाच चर्चेत आहे. आता अक्षय आणि विकीपाठोपाठ आणखी एक बॉलिवूड अभिनेता छत्रपतींच्या भूमिकेत आपल्याला पाहायला मिळण्याची शक्यता आहे.
आणखी वाचा : “मला प्रचंड राग…” पूनम पांडेच्या पब्लिसिटी स्टंटवर इरफानचा मुलगा व अभिनेता बाबिल खानची खरमरीत प्रतिक्रिया
‘पिंकव्हीला’च्या वृत्तानुसार ‘ओह माय गॉड २’चे दिग्दर्शक अमित राय हे लवकरच छत्रपती शिवाजी महाराज यांच्यावर एक भव्य चित्रपट घेऊन येणार आहेत. या चित्रपटात अमित राय शाहीद कपूरला छत्रपती शिवाजी महाराज यांच्या भूमिकेत घेणार असल्याची शक्यता वर्तवली जात आहे. एकूणच चित्रपटाशी जोडलेल्या काही निर्मात्यांनासुद्धा शाहिदच या भूमिकेसाठी योग्य वाटत आहे. शाहिद कपूरनेही या प्रोजेक्टमध्ये रुची दर्शवली आहे.
अद्याप चित्रपटाच्या घोषणेबद्दल कोणतीही माहिती समोर आलेली नसून एका मोठ्या निर्मात्याची सगळेच वाट बघत आहेत. त्यामुळे लवकरच या चित्रपटाची घोषणा होण्याची शक्यता आहे. गेल्या दोन वर्षांपासून शाहीद कपूर हा वेगवेगळ्या भूमिका स्वीकारत असल्याने त्याच्याकडून लोकांच्या अपेक्षा वाढल्या आहेत त्यामुळेच या भूमिकेसाठी शाहिदचा विचार केला जात आहे. लवकरच शाहिद क्रीती सेनॉनबरोबरच्या ‘तेरी बातों में ऐसा उलझा जिया’ या चित्रपटातून मोठ्या पडद्यावर पुन्हा एंट्री घेणार आहे. छत्रपती शिवाजी महाराज यांच्या भूमिकेत आता शाहीद कसा वाटतो ते पाहणं औत्सुक्याचं ठरणार आहे.
