शाहरुख खान व दीपिका पदुकोणचा ‘पठाण’ चित्रपट दहा दिवसांपूर्वी प्रदर्शित झाला. अजूनही हा चित्रपट बॉक्स ऑफिसवर बक्कळ कमाई करत आहे. दहा दिवसांत या चित्रपटाने जगभरात ७२५ कोटी रुपये कमाई केली आहे. तर देशभरात हा चित्रपट ४०० कोटी रुपयांचा टप्पा गाठण्याच्या मार्गावर आहे. चित्रपटाला मिळत असलेलं यश पाहता शाहरुखही अगदी भारावून गेला आहे.
‘पठाण’च्या यशानंतर शाहरुखने #AskSRK ट्विटर सेशन घेतलं. या सेशनद्वारे चाहत्यांनी त्याला अनेक प्रश्न विचारले. या प्रश्नांची शाहरुखने अगदी दिलखुलासपणे उत्तरं दिली. शिवाय ‘पठाण’ची रेकॉर्डब्रेक कमाई पाहून शाहरुख खूश असल्याचंही यावेळी दिसून आलं. त्याला चाहत्यांनी ‘पठाण’साठी शुभेच्छाही दिल्या.
यावेळी “‘पठाण’ चित्रपटाची खरी कमाई किती आहे?” असा प्रश्न एका चाहत्याने शाहरुखला विचारला. यावेळी शाहरुखने अगदी त्याच्या स्टाइलने उत्तर दिलं. तो म्हणाला, “५००० कोटींचं प्रेम, ३००० कोटींची प्रशंसा, ३२५० कोटी मिठी, २ बिलियन हास्य आणि अजूनही मोजत आहे. तुझा अकाऊटंट काय सांगत आहे?”
शाहरुखने अगदी वेगळ्याच अंदाजात उत्तर देत चाहत्यांचं मन जिंकलं. शाहरुखच्या या चित्रपटाने आतापर्यंत अनेक सुपरहिट चित्रपटांचे रेकॉर्ड ब्रेक केले आहेत. शाहरुख व दीपिकासाठी हे मोठं यश आहे. ‘दंगल’, ‘बाहुबली २’, ‘केजीएफ २’ सारख्या चित्रपटांप्रमाणेच ‘पठाण’ही कमाई करत आहे.
