सनी देओल व अमीषा पटेल यांचा ‘गदर २’ चित्रपट लवकरच प्रेक्षकांच्या भेटीला येणार आहे. तब्बल २२ वर्षांनी प्रेक्षकांना चित्रपटाचा सिक्वेल पाहायला मिळणार आहे. अशातच चित्रपटातील पहिलं गाणं रिलीज करण्यात आलं आहे. या गाण्याला अवघ्या दोन तासांत जवळपास दीड मिलियन व्ह्यूज मिळाले आहेत.
निर्मात्यांनी ‘उड़ जा काले कावा’ या ‘गदर एक प्रेम कथा’मधील गाण्याचंच नवीन व्हर्जन तयार केलंय. यामध्ये तारा सिंग व सकिनाचं वाढलेलं वय दिसतंय. तसेच गाण्याचे बोलही बदलण्यात आले आहेत. मूळ गाणं तर सुपरहिट होतंच, पण हे नवीन व्हर्जनही प्रेक्षकांना भावलं आहे. गाण्याला दोन तासांच्या आत १३ लाख लोकांनी पाहिलं आहे.
नेटकरी या गाण्यावर कमेंट्सही करत आहेत. आधीच्या गाण्याप्रमाणेच हे गाणंही उदित नारायण यांनी गायलंय, त्यामुळे चाहते आनंद व्यक्त करत आहेत. त्यांनी दिग्दर्शकाचे आभारही मानले आहेत.
“एखादं जुनं गाणं कसं रिक्रिएट करावं, हे मिथूनकडून शिकावं”, असं एका युजरने म्हटलं आहे.
दरम्यान, ‘गदर’ व आता येऊ घातलेला सिक्वेल या दोन्ही चित्रपटांचं दिग्दर्शन अनिल शर्मा यांनी केलं आहे. ‘गदर २’ ११ ऑगस्ट या दिवशी चित्रपटगृहात प्रदर्शित होणार आहे.
