Jawan movie New Poster : ‘पठाण’ला मिळालेल्या तुफान प्रतिसादानंतर सध्या शाहरुख खानच्या ‘जवान’ चित्रपटाची जोरदार चर्चा सुरु आहे. अ‍ॅटली दिग्दर्शित ‘जवान’ चित्रपट प्रेक्षकांच्या येत्या ७ सप्टेंबरला भेटीला येणार आहे. शाहरुखने नुकतेच सोशल मीडियावर जवान चित्रपटाचे नवे पोस्टर शेअर केले आहे. यामध्ये किंग खानचा हटके लूक पाहायला मिळत आहे.
‘जवान’ चित्रपट प्रदर्शित होण्यासाठी बरोबर ३० दिवस बाकी राहिलेले असताना शाहरुखने हे नवे पोस्टर शेअर केले आहे. या पोस्टरमध्ये शाहरुखच्या डोक्यावर टक्कल, हातात बंदूक, डोळ्याला गॉगल असा हटके लूक पाहायला मिळत आहेत. हे नवीन पोस्टर शेअर करत शाहरुख लिहितो, “मी चांगला आहे की वाईट? (मैं अच्छा हूं या बुरा हूं) फक्त ३० दिवस बाकी…तुम्ही तयार आहात ना?”
बहुचर्चित ‘जवान’ आजपासून बरोबर ३० दिवसांनी म्हणजेच ७ सप्टेंबरला चित्रपटगृहांमध्ये रिलीज होणार आहे. हिंदी, तमिळ आणि तेलगू भाषेमध्ये चित्रपट प्रदर्शित होईल. शाहरुखच्या दुहेरी भूमिका असल्याने खलनायकाच्या भूमिकेसाठी त्याने टक्कल केले असावे असा अंदाज वर्तवण्यात येत आहे.
दरम्यान, शाहरुख खानच्या ‘जवान’ चित्रपटात दाक्षिणात्य अभिनेत्री नयनतारा, अभिनेते विजय सेतुपती, सान्या मल्होत्रा, प्रियमणी, गिरिजा ओक, संजिता भट्टाचार्य, लहर खान, आलिया कुरेशी असे दिग्गज कलाकार दिसणार आहेत. चित्रपटाचे दिग्दर्शन अ‍ॅटलीने केले असून याची निर्मिती गौरी खानने केली आहे.
