Pathaan First Trailer Release : दीपिका पदुकोण व शाहरुख खानचा ‘पठाण’ चित्रपट प्रदर्शनापूर्वीच वादाच्या भोवऱ्यात अडकला. चित्रपटामधील ‘बेशरम रंग’ गाण्यामध्ये दीपिकाने परिधान केलेल्या भगव्या बिकिनीचा वाद चर्चेत राहिला. त्यानंतर चित्रपटामधील ‘झुमे जो पठाण’ हे गाणंही प्रदर्शित झालं. त्यानंतर चित्रपटाच्या ट्रेलरकडे प्रेक्षकांचं लक्ष लागून राहिलं होतं. अखेरीस चित्रपटाचा ट्रेलर प्रदर्शित झाला आहे.
काही दिवसांपूर्वीच प्रदर्शित झालेल्या ‘पठाण’च्या दोन गाण्यांमध्ये दीपिका व शाहरुखची केमिस्ट्री पाहायला मिळली. आता ट्रेलर पाहिल्यानंतर प्रेक्षक अगदी भारावून गेले आहेत. ट्रेलरमध्ये शाहरुख व दीपिकाचे अ‍ॅक्शन सीन्स पाहायला मिळत आहेत. तसेच जॉन अब्राहमही यामध्ये भलताच भाव खाऊन गेला आहे.
पाहा ट्रेलर
हेही वाचा – “पठाणचा ट्रेलर पाहून मी…” ४ वर्षांनी ॲक्शनपटातून कमबॅक करणाऱ्या शाहरुख खानचा खुलासा
भारतावर हल्ला करण्यासाठी आलेल्या जॉनशी दोन हात करताना शाहरुख या ट्रेलरमध्ये दिसत आहे. तर शाहरुखबरोबर दीपिकाही भारतावर होणारा हल्ला टाळण्यासाठी लढताना दिसत आहेत. ट्रेलरमध्ये शाहरुखचा अ‍ॅक्शन अवतार थक्क करणारा आहे. तर दीपिकाच्या अ‍ॅक्शन सीन्सनेही प्रेक्षकांचं लक्ष वेधून घेतलं आहे.
आणखी वाचा – ‘पठाण’ आणि दीपिकाच्या भगव्या रंगाच्या बिकिनीवरून वाद; सेन्सॉर बोर्डाचा मोठा निर्णय
चित्रपटाच्या ट्रेलरला प्रेक्षकांची अधिकाधिक पसंती मिळताना दिसत आहे. वयाच्या ५७व्या वर्षी शाहरुख करत असलेलं काम त्याच्या चाहत्यांच्या पसंतीस उतरत आहे. शाहरुखने या चित्रपटासाठी त्याच्या शरीरयष्टीवर अधिकाधिक मेहनत घेतली आहे. तर ट्रेलर पाहिल्यानंतर दीपिकाही या चित्रपटामध्ये भाव खाऊन जाणार अशी चिन्ह दिसत आहेत. सिद्धार्थ आनंदने या चित्रपटाचं दिग्दर्शन केलं आहे. बहुचर्चित ‘पठाण’ २५ जानेवारीला बॉक्स ऑफिसवर दाखल होईल. या चित्रपटाला प्रेक्षकांचा कितपत प्रतिसाद मिळणार हे पाहणं रंजक ठरणार आहे.
