“…ती आता तुमच्यासमोर अवतरली आहे”, ‘चंद्रमुखी’तील ‘चंद्रा’ साकारणाऱ्या अभिनेत्रीची पोस्ट चर्चेत

या चित्रपटाच्या टीझरमध्ये ढोलकीचा ताल, घुंगरांचे बोल आणि साजशृंगार, सौंदर्याची नजाकत आणि सोबत दिलखेचक अदांनी सर्वांना घायाळ करणारी नृत्यांगना पाहायला मिळत आहे. तमाशातील शुक्राची चांदणी चंद्रा ही भूमिका अभिनेत्री अमृता खानविलकर साकारताना दिसणार आहे. तिने स्वत: पोस्ट शेअर करत याबाबतची माहिती दिली आहे.

अमृता खानविलकरने नुकतंच इन्स्टाग्रामवर एक पोस्ट शेअर केली आहे. त्यात तिने चंद्रमुखी चित्रपटातील नवे पोस्टर शेअर केले आहे. यात ती स्वत: एका नृत्यांगनेच्या भूमिकेत पाहायला मिळत आहे. या कॅप्शन देताना अमृता खानविलकर म्हणाली, “चंद्रा नक्की कोण? ती दिसते कशी? ती हसते कशी? जिच्या दिलखेचक अदांसाठी तुम्ही आतुर होता, ती चंद्रा आता तुमच्या समोर अवतरली आहे.”

“ढोलकीच्या तालात, घुंगरांची साथ घेऊन, तुम्हा रसिकांच्या टाळ्या शिट्ट्यांच्या गजरात मी चंद्रा तुमच्या समोर आले आहे. मी आले आहे तुमचं मनोरंजन करायला, तुम्हाला प्रेमाची नवी व्याख्या सांगायला आणि लावणीच्या ठेक्यात मनमुराद नाचवायला…तर मग तयार आहात ना?” असा प्रश्नही अमृताने विचारला आहे.

‘चंद्रमुखी’ हा चित्रपट लेखक विश्वास पाटील यांच्या ‘चंद्रमुखी’ या कांदबरीवर आधारित आहे. या चित्रपटाचे दिग्दर्शन प्रसाद ओक यांनी केले आहे. तर पटकथा-संवाद चिन्मय मांडलेकर यांचे आहेत. या चित्रपटात दमदार दौलतच्या भूमिकेत आदिनाथ कोठारे दिसणार आहे. तर चंद्राच्या भूमिकेत अमृता खानविलकर प्रेक्षकांच्या भेटीला येणार आहे. या चित्रपटाला अजय -अतुल यांचे जबरदस्त संगीत लाभले आहे.