Marathi Actress New Home : मुंबई या स्वप्ननगरीत अनेक जण आपली स्वप्नं पूर्ण करण्यासाठी येतात. मुंबईत स्वत:चं घर घेण्याचं प्रत्येकाचंच स्वप्न असतं आणि या स्वप्नपूर्तीसाठी प्रत्येक जण मेहनतही करीत असतो. गेल्या काही दिवसांत अनेक कलाकारांनी मुंबईत स्वत:चं घर घेत स्वप्नपूर्ती केली आहे. नुकतंच मराठी अभिनेता गौरव मोरेनं नवीन घर घेतल्याची गुड न्यूज दिली. त्यानंतर आता आणखी एका मराठी अभिनेत्रीनंसुद्धा स्वतःचं नवं घर घेतलं आहे.
लोकप्रिय मराठी अभिनेत्री मीरा जोशीनं दसऱ्याच्या शुभ मुहूर्तावर मुंबईत नवीन घर घेतल्याची बातमी शेअर केली आहे. मीरा जोशी सोशल मीडियावर कायमच सक्रिय असते. सोशल मीडियावर ती तिचे फोटो-व्हिडीओ शेअर करताना दिसते. अशातच नव्या घरातील गृहप्रवेशाचा खास व्हिडीओ अभिनेत्रीनं आपल्या सोशल मीडियाद्वारे शेअर केला आहे. तसंच मीरानं नवीन घराबद्दलच्या आनंदी भावनाही व्यक्त केल्या आहेत.
मीरा म्हणते, “१३ हा नंबर माझ्या खूप जवळचा आहे. माझी जन्मतारीख १३. माझ्या फ्लॅटचा फ्लोअर नंबर १३ च आणि फ्लॅट नंबरसुद्धा १३ च. हा निव्वळ योगायोग नाही; जणू काही युनिव्हर्स मला येथे आणण्यासाठी एकवटलं होतं, असं म्हणावं लागेल. हे सगळं गणित जुळवून आणल्याबद्दल म्हाडाचे आभार. मुंबईत फ्लॅट असावा, हे स्वप्न मी गेली १५ वर्षं उराशी बाळगून होते. कारण- हीच आता माझी कर्मभूमी आहे. १५ वर्षांपूर्वी मुंबईत आले. मुंबईनं मला आपलंसं केलं. अर्थात, मुंबई सर्वांनाच आपलंसं करून घेते. इतकी वर्षं भाड्याच्या घरात राहिले. भाड्याच्या घरातही चांगले दिवस गेले. कोणत्याच घरमालकानं कधी ‘खाली करा’ असं सांगितलं नाही. पण, स्वतःचं असं एक घर असावं, असं कोणाला वाटत नाही?”
पुढे मीरा म्हणते, “माझा स्वभाव उधळा नसल्यानं माझं पंधरा वर्षांचं थोडंफार सेव्हिंग होतं. माझ्या दादाच्या योग्य सल्ल्यानं पै आणि पै अगदी योग्य ठिकाणी बचत केली होती. पण, ती रक्कम एक फ्लॅट घेण्यासाठी पुरेशी नव्हती. तसंच फ्लॅट घेण्यासाठी पालक देऊ करीत असलेली मदतही मी नम्रपणे नाकारली. पण अडचण अशी आली की, या क्षेत्रामधील लोकांना बँका लोन देत नाहीत. कारण- आमचं ठोस असं उत्पन्न नसतं. मग बाबांनी बँकेचं होम लोन करून दिलं आणि शेवटी माझं आज घर झालं.”
पुढे मीरा सांगते, “खरं तर हे वर्ष माझ्यासाठी धाडसाचं आणि आव्हानात्मक होतं. स्वप्नांना योग्य दिशा देणार होतं, असं म्हटलं तरी चालेल. माझं ‘कृष्णसखी’ हे प्रॉडक्शन हाऊससुद्धा मी याच वर्षी सुरू केलं आणि घर घेण्याचा योगसुद्धा याच वर्षी आला. माझ्या आईनं नेहमीच माझ्यावर विश्वास दाखवला. सगळ्यात महत्त्वाचं म्हणजे मूल्यांशी कोणतीही तडजोड न करता, स्वतःच्या अटींवर काम करण्यास प्रवृत्त करणं तिनं शिकवलं. माझ्या आईमुळेच रत्नागिरीतील एक मुलगी स्वप्नांच्या शहरात मोठी स्वप्नं पाहू शकली. अर्थात, प्रत्येक क्षेत्रात संघर्ष असतो. तसा तो मीसुद्धा केला. त्यात मी काही मोठं केलं, असं मला वाटत नाही.”
मीरा जोशी इन्स्टाग्राम व्हिडीओ
नंतर मीरानं तिचे जवळचे नातेवाईक आणि मित्रपरिवाराचे आभार मानले आहेत. ती म्हणते, “माझे आई-बाबा, माझा दादा, माझा मित्र दुर्गेश, माझे मामा-मामी आणि माझ्यावर प्रेम करणारे आपण सर्व प्रेक्षक मायबाप… या सर्वांचे आभार. माझ्या चढत्या आलेखासाठी आणि सर्वांत महत्त्वाची बाब म्हणजे माझी काळजी घेतल्याबद्दल आणि चढ-उतारांमध्ये मला मार्गदर्शन केल्याबद्दल मी देवाचे आभार मानते. तो सदैव माझ्याबरोबर असणार आहे. मला त्याची खात्री आहे.” दरम्यान, नवीन घराच्या स्वप्नपूर्तीबद्दल मनोरंजन विश्वातील अनेक कलाकारांनी मीराला शुभेच्छा दिल्या आहेत.
