सासू-सुनेची गोष्ट! केदार शिंदेंचा नवा सिनेमा ‘या’ तारखेला प्रदर्शित होणार, पोस्टर आलं समोर, ‘त्या’ जोडीला ओळखलंत का?

‘अगं अगं सुनबाई! काय म्हणताय सासूबाई?’ या चित्रपटाच्या निमित्ताने दिग्दर्शक केदार शिंदे यांची कन्या सना शिंदे पहिल्यांदाच निर्मितीची धुरा सांभाळत आहे.

या सिनेमाच्या पहिल्या पोस्टरमध्ये सासू-सुनेची जोडी पाठमोरी दिसत आहे. आता सासू-सूनेच्या भूमिकेत कोण झळकणार याची उत्सुकता प्रेक्षकांना लागली आहे. प्रत्येक घरात, कुटुंबात घडणारी सासू-सुनेच्या नात्याची मजेशीर केमिस्ट्री, हलकीशी चतुराई, जिव्हाळा आणि न संपणारी टोलेबाजी याचे गोड-तिखट चित्रण लवकरच प्रेक्षकांच्या भेटीला येणार आहे. आता सासू-सुनेच्या भूमिकेतील अभिनेत्री नेमक्या कोण आहेत? याबद्दल सोशल मीडियावर चर्चा रंगली आहे. अंबिका रांजणकर यांनी या सिनेमाच्या पोस्टरवर कमेंट केल्यामुळे सासूच्या भूमिकेत त्या झळकणार आहेत का? अशी शंका निर्माण झालीये. मात्र, या लोकप्रिय अभिनेत्री निर्मिती सावंत देखील असू शकतात; चित्रपटाच्या टीमने अद्याप या सासू-सुनेच्या भूमिकेत कोण झळकणार याची कोणतीही माहिती शेअर केलेली नाही. लवकरच याचा उलगडा होईल.

दिग्दर्शक केदार शिंदे म्हणतात, “प्रत्येक घरात सासू-सुनेचं नातं वेगळ्या रंगात दिसतं. कधी हसू, कधी नोकझोक, कधी भांडण तर कधी काळजी आणि प्रेम. प्रत्येकाच्या कुटुंबातील ही दोन वेगळी व्यक्तिमत्त्वं, दोन विचार आणि दोन घर सांभाळणाऱ्या स्त्रियांचं सामर्थ्य या चित्रपटात पाहायला मिळेल. तसेच हा चित्रपट माझ्या खूप जवळचा आहे, कारण या चित्रपटाच्या निमित्ताने सनाने निर्मिती क्षेत्रात पाऊल टाकलं आहे आणि ही माझ्यासाठी अभिमानाची गोष्ट आहे.”

झी स्टुडिओजचे व्यवसाय प्रमुख बवेश जानवलेकर म्हणतात, “केदार शिंदे हे अत्यंत संवेदनशील दिग्दर्शक आहेत. त्यांनी प्रेक्षकांना नेहमीच दर्जेदार चित्रपट दिले आहेत. या चित्रपटातही असाच काहीसा अनुभव प्रेक्षकांना मिळणार आहे. ‘अगं अगं सूनबाई! काय म्हणताय सासूबाई? ’ ही आजच्या पिढीच्या सासू-सूनेची गोष्ट आहे. घरातील प्रत्येक सूनबाई आणि सासूबाईंना ही कथा नक्कीच भावेल आणि त्यांची वाटेल.”

दरम्यान, ‘अगं अगं सुनबाई! काय म्हणताय सासूबाई?’ हा सिनेमा पुढच्या वर्षी १६ जानेवारी २०२६ रोजी प्रदर्शित होणार आहे.