Dashavatar Box Office Collection Day 4: ‘दशावतार’ या मराठी चित्रपटाला प्रेक्षकांचा उत्तम प्रतिसाद मिळत आहे. कोकणाची पार्श्वभूमी असलेल्या या चित्रपटाने बॉक्स ऑफिस गाजवलं आहे. ४ दिवसांत या चित्रपटाने कोट्यवधी रुपयांची कमाई केली आहे. रविवारी जबरदस्त कलेक्शन करणाऱ्या दशावतार या चित्रपटाच्या चौथ्या दिवसाच्या कमाईचे आकडे समोर आले आहेत.
‘दशावतार’ शुक्रवारी, १२ सप्टेंबर रोजी जगभरात प्रदर्शित झाला. ‘दशावतार’ची बॉक्स ऑफिस ओपनिंग संथ झाली होती, मात्र कमाईच्या बाबतीत दुसऱ्या दिवशी या चित्रपटाने वेग पकडला. त्यानंतर सलग तीन दिवस याची कमाई कोटींमध्ये आहे. सोमवारी सुट्टी नसूनही ‘दशावतार’ने एक कोटींपेक्षा जास्त कमाई केली आहे.
‘दशावतार’ चे बॉक्स ऑफिस कलेक्शन
‘दशावतार’ ने तीन दिवसांत जगभरात तब्बल ५.२२ कोटी रुपयांची कमाई केली, अशी माहिती निर्मात्यांनी दिली. आता इंडस्ट्री ट्रॅकर सॅकनिल्कने दिलेल्या आकडेवारीनुसार, दशावतारने सोमवारी १ कोटी एक लाख रुपये कमावले. ही प्रारंभिक आकडेवारी आहे. अधिकृत आकडेवारी आल्यानंतर यात बदल होऊ शकतो. ‘दशावतार’ ने चार दिवसांत एकूण ६.२३ कोटी रुपयांचा गल्ला जमवला आहे.
‘दशावतार’ हा कोकणात घडणाऱ्या गूढ कथेवर आधारित चित्रपट आहे. यात ज्येष्ठ अभिनेते दिलीप प्रभावळकर यांनी कलासक्त वृद्ध दशावतारी बाबुली मेस्त्री ही भूमिका केली आहे. ‘दशावतार’चं पहिलं पोस्टर रिलीज करण्यात आलं होतं, तेव्हापासून या चित्रपटाची सिनेविश्वात चर्चा होती. ट्रेलर रिलीज झाल्यानंतर प्रेक्षकांची उत्सुकता शिगेला पोहोचली होती.
चित्रपट प्रदर्शित झाल्यानंतर दशावतारला प्रेक्षकांचं भरभरून प्रेम मिळतंय. प्रेक्षक हा चित्रपट पाहायला सिनेमागृहांमध्ये गर्दी करत आहेत. कोकणातील नयनरम्य ठिकाणी सलग ५० दिवस या सिनेमाचं शूटिंग झालंय. कोकणातील दशावतार ही परंपरा, दशावतारी नाट्यकला यांचा सुरेख मिलाफ या सिनेमात दाखवण्यात आला आहे.
‘दशावतार’ या चित्रपटात दिलीप प्रभावळकर, महेश मांजरेकर, भरत जाधव, सिद्धार्थ मेनन, अभिनय बेर्डे, प्रियदर्शिनी इंदलकर अशी मराठी चित्रपटातील दिग्गज कलाकारांची फौज आहे. तसेच विजय केंकरे, सुनील तावडे, रवी काळे, लोकेश मित्तल, आरती वडगबाळकर यांच्याही महत्त्वाच्या भूमिका आहेत.
