मराठीमधील तरुण अभिनेत्रींमध्ये ऋता दुर्गुळेचं नाव आवर्जुन घेतलं जातं. ऋताचा इथवरचा प्रवास खरंच कौतुकास्पद आहे. विविध मराठी मालिकांमध्ये महत्त्वाच्या भूमिका साकारत तिने प्रेक्षकांना आपलंस केलं. मराठी मालिकांनी तिला खरी ओळख मिळवून दिली. ‘दुर्वा’, ‘फुलपाखरु’, ‘मन उडू उडू झालं’ अशा मालिकांमध्ये तिने काम केलं. ऋता अगदी सामान्य कुटुंबातून आलेली मुलगी आहे.
ऋताचा काही दिवसांपूर्वीच ‘सर्किट’ चित्रपट प्रदर्शित झाला. या चित्रपटामुळे ती सध्या बरीच चर्चेत आहे. ऋताने अभिनय कौशल्याच्या जोरावर स्वतःची एक वेगळीच ओळख निर्माण केली. ऋता तिच्या खऱ्या आयुष्यामध्ये नेमकी कशी आहे? तिचं कुटुंब कसं आहे? याबाबत तिने नुकत्याच दिलेल्या एका मुलाखतीत भाष्य केलं.
सुलेखा तळवलकर यांच्या ‘दिल के करीब’ या कार्यक्रमात ऋताला तिच्या कुटुंबियांबाबत तसेच बालपणाविषयी विचारण्यात आलं. तेव्हा ती म्हणाली, “आम्ही आधी लालबागमध्ये राहत होतो. एकत्रित कुटुंबामध्येच माझा जन्म झाला आहे. आमचं आधी एकत्रित कुटुंब होतं. माझं बालपण खूपच छान होतं”.
“मला लहान भाऊ आहे. त्याचं नाव रुग्वेद. तो कलाक्षेत्रामध्येच कार्यरत आहे. पण प्रॉडक्शनमध्ये तो काम करतो. बॉलिवूड, जाहिराती, ओटीटीचं तो काम पाहतो. माझे बाबा व्यावसायिक आहेत. ऊसाचा रस काढण्याची मशिन बनवण्याची आमची फॅक्ट्री आहे. माझ्या पंजोबांपासून आमचा हा व्यवसाय सुरू आहे. आई ही एक गृहिणी आहे. पण गृहिणी म्हणूनही काम करणं किती कष्टाचं आहे हे मला माझं लग्न झाल्यानंतर कळालं”. ऋताचा आतापर्यंतचा संपूर्ण प्रवास खरंच उल्लेखनीय आहे.
