Raj Thackeray Praises Mahesh Manjrekar : प्रसिद्ध दिग्दर्शक, निर्माते व अभिनेते म्हणजे महेश मांजरेकर लवकरच त्यांचा ‘पुन्हा शिवाजीराजे भोसले’ हा आगामी चित्रपट घेऊन येत आहेत. या वर्षी महाराष्ट्रदिनी ‘पुन्हा शिवाजीराजे भोसले’ या चित्रपटाची घोषणा त्यांनी केली होती. तेव्हापासून प्रेक्षक मंडळी या सिनेमाची आतुरतेने वाट पाहत आहेत. अशातच या सिनेमाचा ट्रेलर सोहळा नुकताच पार पडला.
राज ठाकरे यांच्या विशेष उपस्थितीत पार पडलेल्या या सोहळ्याला चित्रपटातील कलाकार, तंत्रज्ञांसोबतच अनेक मान्यवरांनी हजेरी लावली होती. यावेळी राज ठाकरेंनी महेश मांजरेकरांचं आणि त्यांच्या ‘पुन्हा शिवाजीराजे भोसले’ या सिनेमाचं कौतुक केलं.
राज ठाकरे म्हणाले, ” ‘पुन्हा शिवाजीराजे भोसले’चा ट्रेलर बघताना मला सुचलं की, महेश कोठारे यांना सांगितलं पाहिजे की, त्यांनी ‘झपाटलेला २’ हा सिनेमा महेश मांजरेकरांवर काढला पाहिजे. कारण- महेश खरंच झपाटलेला आहे. तो कधीही भेटला की, एखाद्या सिनेमाबद्दलच बोलतो. बरं त्यातही एक वेगळाच विचार घेऊन येतो. जे पाहतो ते भव्य पाहतो. आमच्यात ही एक गोष्ट कॉमन आहे आणि ती म्हणजे आम्ही जे पाहतो, ते भव्य पाहतो.”
पुढे राज ठाकरे म्हणतात, “‘मी शिवाजीराजे भोसले बोलतोय’ हा पहिला सिनेमा मुंबई, ठाणे, पुणे, नाशिक अशा शहरांसाठी होता; पण तो ‘पुन्हा शिवाजीराजे भोसले बोलतोय’ हा सिनेमा ग्रामीण महाराष्ट्रासाठीचा आहे. त्या महाराष्ट्राबद्दलच्या संवेदना जाग्या असल्याशिवाय असे सिनेमे घडत नाहीत. शेतकरी आणि त्यांच्या आत्महत्येबद्दलचा विषय अशा प्रकारे मांडणं हे एक वेगळंच धाडस आहे आणि वेगळा विचार आहे. हा विचार महेश नेहमीच करत असतो.”
त्यानंतर ते महेश मांजरेकरांचं कौतुक करीत म्हटलं, “मी मागे एकदा म्हटलं होतं की, हिंदी चित्रपटसृष्टीत यश चोप्रा आहेत; तसं मराठीत महेश मांजरेकर आहेत. ‘पुन्हा शिवाजीराजे भोसले बोलतोय’ हा सिनेमाला महाराष्ट्रातून नक्कीच चांगला प्रतिसाद मिळेल. छत्रपती शिवाजी महाराजांवर आधारित असे अनेक सिनेमे आले, ज्यांना प्रेक्षकांनीही उत्तम प्रतिसाद दिला. ते सिनेमे छत्रपती शिवाजी महाराजांवर आधारित ऐतिहासिक सिनेमे होते. पण महेश ‘पुन्हा शिवाजीराजे भोसले बोलतोय’च्या निमित्ताने वर्तमान आणि भूतकाळावर आधारित सिनेमा घेऊन येत आहेत. त्यामुळे महाराष्ट्रातली मराठी जनता हा सिनेमा डोक्यावर घेईल, असं मला वाटतं. महेश, सिनेमातले कलाकार आणि सगळ्याच टीमला माझ्याकडून मन:पूर्वक शुभेच्छा.”
राज ठाकरेंकडून महेश मांजरेकरांचं कौतुक
दरम्यान, ‘पुन्हा शिवाजी राजे भोसले’ या चित्रपटाचं लेखन आणि दिग्दर्शन महेश वामन मांजरेकर यांनी केलं आहे. सिनेमात अभिनेते सयाजी शिंदे, सिद्धार्थ बोडके, मंगेश देसाई, शशांक शेंडे, पृथ्वीक प्रताप, पायल जाधव, त्रिशा ठोसर ही कलाकार मंडळी झळकणार आहेत.
