अभिनेत्री रिंकू राजगुरू ‘सैराट’ चित्रपटामुळे घराघरांत लोकप्रिय झाली. २०१६ मध्ये प्रदर्शित झालेल्या या चित्रपटात तिने आर्ची हे मुख्य पात्र साकारलं होतं. नुकतीच रिंकू हेमंत ढोमे दिग्दर्शित ‘झिम्मा २’ चित्रपटात झळकली होती. अभिनेत्री सोशल मीडियावर प्रचंड सक्रिय असते. रिंकूने अलीकडेच नववर्षाचं औचित्य साधत इन्स्टाग्रामवर खास ‘आस्क मी सेशन’ घेतलं होतं.
रिंकूला इन्स्टाग्राम आस्क मी सेशनमध्ये तिच्या चाहत्यांनी विविध प्रश्न विचारले होते. यात एका चाहत्याच्या प्रश्नाने सर्वांचं लक्ष वेधून घेतलं. “तुझ्या बॉयफ्रेंडचं नाव काय आहे?” असा प्रश्न रिंकूला विचारण्यात आला. यावर ती म्हणाली, “बॉयफ्रेंड नाही…नावही नाही” यामुळे अभिनेत्री सध्या कोणालाही डेट करत नसल्याचं स्पष्ट झालं आहे.
रिंकूला आणखी एका चाहत्याने “तू तेलुगू चित्रपटात केव्हा काम करणार?” असा प्रश्न विचारला होता. यावर अभिनेत्रीने “मला खरंच तेलुगू चित्रपटात काम करण्याची इच्छा आहे. ही संधी लवकरच मिळेल अशी अपेक्षा आहे.” असं उत्तर दिलं होतं.
दरम्यान, इन्स्टाग्राम आस्क मी सेशनमध्ये रिंकूने तिच्या खऱ्या नावाचा देखील खुलासा केला होता. अभिनेत्रीचं रिंकू हे टोपणनाव असून तिचं खरं नाव प्रेरणा राजगुरु आहे असं तिने चाहत्याला सांगितलं. याशिवाय अभिनेत्रीच्या कामाबद्दल सांगायचं झालं, तर रिंकू शेवटची ‘झिम्मा २’ चित्रपटात झळकली होती. यामध्ये तिने निमिर्ती सावंत यांची सूनबाई ‘तानिया’ची भूमिका साकारली होती.
