यंदा जून महिन्याच्या अखेरीस ‘झी मराठी’ वाहिनीवर ‘कमळी’ ही मालिका प्रेक्षकांच्या भेटीला आली. या मालिकेत गावाकडे राहणारी ‘कमळी’ तिची स्वप्न पूर्ण करण्यासाठी शहरात आल्याचं पाहायला मिळतंय. पण, ‘कमळी’ची खरी ओळख वेगळीच असते. तिची आई आणि ती लहानपणी एका मोठ्या कारस्थानाला बळी पडतात आणि या मायलेकींना कुटुंबापासून दूर गावात येऊन राहावं लागतं.
‘कमळी’ मालिकेत मुख्य भूमिका साकारतेय लोकप्रिय अभिनेत्री विजया बाबर. सध्या सर्वत्र नवरात्रीचा उत्साह पाहायला मिळतोय. नवरात्र म्हणजे शक्तीची, भक्तीची आणि स्त्रीत्वाची विविध रूपं. ‘कमळी’ची भूमिका साकारणाऱ्या विजयाने सुद्धा आपल्या वैयक्तिक आयुष्यात नवदुर्गांचे नऊ गुण आत्मसात केले आहेत.
विजया म्हणते, “गेल्या पाच वर्षांपासून मी स्वबळावर जगत आहे. माझं आर्थिक नियोजन, घर चालवणं आणि प्रत्येक जबाबदारी मी स्वतः सांभाळते. ही ताकद म्हणजेच ‘शैलपुत्री’ देवीची स्थिरता, धैर्य आणि आत्मविश्वास आहे. ‘ब्रह्मचारिणी’ देवीसारखी शिस्त, आत्मसंयम, आणि एकाग्रता माझ्या स्वभावाचा भाग आहे. मी कधीही क्षणात प्रतिक्रिया देत नाही, आधी विचार करते, मग बोलते. ‘चंद्रघंटा’ देवी संयम आणि शांतीची प्रेरणा आहे. माझ्यातील सृजनशीलता आणि ऊर्जा कुठल्याही नवीन भूमिकेत मला सहज सामावून घेते.”
“मी माझ्या आयुष्यात ‘कुशमांडा’ देवीसारखी ऊर्जा अनुभवते. काहीही नवीन सुरु करायचं असेल, तर माझ्याकडे ती जिद्द आणि सर्जनशक्ती असते. ‘स्कंदमाते’प्रमाणे मी माझ्या जवळच्या लोकांविषयी खूप प्रेमळ आणि रक्षणाची भावना ठेवते. कोणत्याही प्रसंगात मी त्यांच्याबरोबर उभी असते. ‘कात्यायनी’ देवीचं उग्र रूप अजून कधीच बाहेर आलं नाही, पण चुकीच्या गोष्टींचा सामना करण्यासाठी माझ्यात ती जिद्द आणि न्यायासाठी उभं राहण्याचं बळ आहे, याची मला जाणीव आहे आणि तशीच भूमिका मी सध्या ‘कमळी’ म्हणून साकारत आहे.”
विजया नाव का ठेवलं?
“मी नेहमी सकारात्मक लोकांमध्ये राहते, नकारात्मकतेपासून दूर राहते हेच ‘कालरात्री’ देवीचे गुण माझ्यात आहेत. तसंच, माझं आयुष्य ‘महागौरी’प्रमाणे शांतीपूर्ण आहे. ‘सिद्धिदात्री’ देवीसारखी परिपूर्णता आणि समजून घेण्याची ताकद मी नेहमी साध्य करण्याचा प्रयत्न करते. परिपूर्ण नाही, पण प्रत्येक गोष्ट चांगली करण्यासाठी मी मनापासून प्रयत्न करते. या सगळ्या गुणांचा पाया माझ्या आईकडे आणि बहिणीकडे आहे. माझं कुटुंब माझं शक्तिस्थान आहे. पण मी स्वतंत्र राहायला लागल्यावर, काम करायला लागल्यावर, हे गुण मी स्वतःमध्ये वाढवले, असं विजयाने भावनिकपणे सांगितलं.
“माझा जन्म विजयादशमीच्या दिवशी झाला म्हणून माझं नाव ‘विजया’ ठेवलं. त्यामुळे नवरात्र आणि दसरा या सणांशी माझं खूप जवळचं नातं आहे. हा सण मला केवळ धार्मिक व वैयक्तिक आत्मशक्तीची आठवण करून देतो.” असं विजया बाबरने ( कमळी ) स्पष्ट केलं.
