‘महाराष्ट्राची हास्यजत्रा’ ( Maharashtrachi Hasyajatra ) आणि ‘चला हवा येऊ द्या’ हे मराठीतील दोन लोकप्रिय विनोदी कार्यक्रम आहे. मागील सहा वर्षांपासून ‘महाराष्ट्राची हास्यजत्रा’ प्रेक्षकांना खळखळून हसवण्याचं काम करत आहे. तसंच ‘चला हवा येऊ द्या’ ( Chala Hawa Yevu Dya ) कार्यक्रमाने देखील १० वर्ष अविरत मनोरंजन केल्यानंतर काही महिन्यांपूर्वी प्रेक्षकांचा निरोप घेतला. तरीही या कार्यक्रमातील कलाकार नेहमी चर्चेत असतात. अशातच ‘महाराष्ट्राची हास्यजत्रा’ आणि ‘चला हवा येऊ द्या’ मधील कलाकारांची अचानक भेट झाली. याचा फोटो सध्या सोशल मीडियावर चांगलाच व्हायरल झाला आहे.
‘महाराष्ट्राची हास्यजत्रा’ आणि ‘चला हवा येऊ द्या ‘मधील कलाकारांच्या भेटीचा फोटो अभिनेता, लेखक, दिग्दर्शक प्रसाद खांडेकरने ( Prasad Khandekar ) सोशल मीडियावर शेअर केला आहे. या फोटोमध्ये नम्रता संभेराव, श्रेया बुगडे, कुशल बद्रिके, गौरव मोरे, भारत गणेशपुरे, सागर कारंडे, अरुण कदम, समीर चौगुले, नेहा खान हे अवलिय कलाकार पाहायला मिळत आहे. प्रसाद खांडेकरने हा फोटो शेअर करत लिहिलं आहे की, लवकरच….पुन्हा भेटू आणि खूप गप्पा मारू असं एकमेकांना प्रॉमिस करून निघालो आम्ही. आज अचानक गाठ पडली…मित्रांबरोबर एक प्रसन्न सकाळ.
हेही वाचा – ‘झी मराठी’वर सुरू होणार ‘लक्ष्मी निवास’! कन्नड मालिकेचा रिमेक, प्रमुख भूमिकांसाठी ‘या’ दोन नावांची चर्चा
अभिनेता कुशल बद्रिकेने देखील या अचानक भेटीचा फोटो इन्स्टाग्राम स्टोरीवर शेअर केला आहे. हा फोटो शेअर करत त्यानं लिहिलं आहे की, जबरी.
फोटो पाहून नेटकरी म्हणाले…
दरम्यान, प्रसाद खांडेकरने शेअर केलेल्या फोटोवर कलाकार मंडळींसह चाहत्यांनी भरभरून प्रतिक्रिया दिल्या आहेत. “झुंड आहे”, “तुम्ही सर्व महाराष्ट्राची शान आहात”, “काहीतरी कॉमेडी शो येतोय वाटतं?”, “कॉमेडीचे मल्टीवर्स”, “तुम्हाला सगळ्यांना एकत्र पाहून आनंद झाला”, अशा प्रकारच्या नेटकऱ्यांच्या प्रतिक्रिया उमटल्या आहेत.
