Savita Prabhune On Bigg Boss Show : छोट्या पडद्यावरील वादग्रस्त तरी तितकाच लोकप्रिय शो म्हणजे ‘बिग बॉस’. हिंदीसह मराठी भाषेतही ‘बिग बॉस’ हा शो प्रेक्षकांच्या भेटीला आला आहे. ‘बिग बॉस मराठी’चे आतापर्यंत पाच सीझन्स झाले असून, या प्रत्येक सीझनला प्रेक्षकांकडून चांगलाच प्रतिसाद मिळाला आहे. या प्रत्येक सीझनमध्ये अनेक मराठी कलाकारांनी सहभाग घेतला आहे. अशातच मराठी अभिनेत्री सविता प्रभुणेंनीही या शोमध्ये सहभागी व्हायला आवडेल असं म्हटलं आहे.
नुकत्याच दिलेल्या एका मुलाखतीत सविता प्रभुणेंना ‘बिग बॉस’साठी कधी विचारणा झाली नाही का? असा प्रश्न विचारण्यात आला. याबद्दल सविता प्रभुणे म्हणाल्या, “मला आजवर कधी विचारणा झाली नाही. कारण – मी परखड बोलत नाही. म्हणजे एकदम पटकन उत्तर देणं मला जमत नाही. पण कदाचित मला बोलावलं तर मी जाईनही… मला माहित नाही काय होईल?”
अमोल परचुरे यांच्या मुलाखतीत सविता प्रभुणे पुढे असं म्हणाल्या, “प्रोजेक्ट म्हणून ‘बिग बॉस’कडे बघणं खूपच इंटरेस्टिंग आहे, असं मला वाटतं. प्रोजेक्ट म्हणून तिकडे जायचं आणि काही दिवस राहून यायचं असा विचार केला, तर मला ‘बिग बॉस’मध्ये नक्कीच जायला आवडेल. कारण शेवटी प्रेक्षकांपर्यंत चांगल्या पद्धतीने पोहोचणे हा हेतु आहेच.”
सविता प्रभुणे यांनी आजवर अनेक मालिका, सिनेमे आणि नाटकांमधून प्रेक्षकांचं मनोरंजन केलं आहे. नकारात्मक भूमिकांबरोबरच त्यांनी काही नकारात्मक भूमिकांमधूनही प्रेक्षकांचं मनोरंजन केलं आहे. अशातच त्यांचा नवा सिनेमा प्रेक्षकांच्या भेटीला आला आहे. प्रसाद ओक यांच्या ‘वडापाव’ या सिनेमातून सविता प्रभुणे मोठ्या पडद्यावर पाहायला मिळणार आहेत. २ ऑक्टोबर रोजी हा सिनेमा प्रदर्शित झाला आहे.
सविता प्रभुणे इन्स्टाग्राम पोस्ट
‘वडापाव’ या चित्रपटात सविता प्रभुणे यांच्यासह प्रसाद ओक, अभिनय बेर्डे, गौरी नलावडे, रसिका वेंगुर्लेकर, शाल्व किंजवडेकर, रितिका श्रोत्री यांच्या प्रमुख भूमिका आहेत. प्रसाद ओक दिग्दर्शित या चित्रपटाचे अमित बस्नेत, प्रजय कामत, स्वाती खोपकर आणि निनाद नंदकुमार बत्तीन निर्माते आहेत.
