आमचं पहिलं घर! मराठी अभिनेत्रीने दाखवली नव्या घराची झलक, नेमप्लेटने वेधलं लक्ष; नवरा ‘या’ लोकप्रिय मालिकेत करतोय काम

‘स्टार प्रवाह’ वाहिनीवर २३ डिसेंबर २०२४ रोजी ‘तू ही रे माझा मितवा’ ही मालिका सुरू झाली होती. यामध्ये नम्रता देसाई ही भूमिका साकारणाऱ्या लोकप्रिय अभिनेत्री मधुरा जोशीने नुकतीच नवीन घर घेतल्याची आनंदाची बातमी सोशल मीडियावर शेअर केली आहे.

मधुरा जोशी व तिचा पती अभिनेता गुरु दिवेकर यांनी मिळून हे नवीन घर खरेदी केलं आहे. गुरु दिवेकर सध्या ‘झी मराठी’वरील ‘सावळ्याची जणू सावली’ या मालिकेत सोहमची भूमिका साकारत आहे. मधुरा आणि गुरु यांची ओळख ‘सोनी मराठी’ वाहिनीवरील ‘सारे तुझ्याचसाठी’ या मालिकेच्या सेटवर झाली होती. नंतर हळुहळू दोघांमध्ये मैत्री होऊन पुढे या मैत्रीचं रुपांतर प्रेमात झालं.

आता गुरु आणि मधुरा यांनी आपलं पहिलं घर खरेदी केलं आहे. मधुराने तिच्या नव्या घराची झलक इन्स्टाग्रामवर शेअर केली आहे. अभिनेत्री लिहिते, “पहिलं घर…नवीन घरातील आमचा पहिला बाप्पा. वारकरी आले आमच्या घरी” गुरु-मधुराने बाप्पाच्या स्वागतासाठी खास पंढरपूर वारीची सजावट केली आहे. तर, मधुराने शेअर केलेल्या दुसऱ्या एका फोटोमध्ये उकडीच्या मोदकांची झलक देखील पाहायला मिळत आहे. त्यांच्या नव्या घराच्या नेमप्लेट डिझाइनमध्ये खणाच्या साडीचा वापर करून त्यावर ‘गुरु अँड मधुरा’ अशी त्यांची नावं लिहिण्यात आली आहे.

दरम्यान, रेवती लेले, ऐश्वर्या नारकर, अभिजीत आमकर, गिरीजा प्रभू या कलाकारांनी गुरु आणि मधुरावर या नव्या घरासाठी कौतुकाचा वर्षाव केला आहे.