‘सहकुटुंब सहपरिवार’ फेम कोमल कुंभार लवकरच झळकणार नव्या भूमिकेत, स्टार प्रवाहच्या ‘या’ लोकप्रिय मालिकेत पाहायला मिळणार

‘सहकुटुंब सहपरिवार’ मालिकेत अभिनेत्री कोमल कुंभारने अंजली ही भूमिका उत्तमरित्या साकारली होती. त्यामुळे कोमलला पुन्हा एकदा नव्या भूमिकेत पाहण्यासाठी तिचे चाहते देखील उत्सुक होते. आता कोमल लवकरच ‘अबोली’ या मालिकेत झळकणार आहे. या मालिकेत अभिनेत्री मनवाच्या भूमिकेत ती पाहायला मिळणार आहे.

हेही वाचा – व्हॅलेंटाईन डेला साखरपुडा, तर लग्न…; प्रथमेश परबच्या अनोख्या लग्नपत्रिकेने वेधलं लक्ष

‘अबोली’ मालिकेतील मनवा ही नेमकी कोण आहे? याची उत्कंठा प्रेक्षकांमध्ये होती. अखेर मनवा ही कोमल कुंभार असणार आहे, हे समोर आलं आहे. मनवा ही मालिकेतील खूप महत्त्वाची भूमिका आहे. गेल्या कित्येक दिवसांपासून मनवाचा अबोली शोध घेत आहे. तिचा शिंदे कुटुंबाशी आणि बहुरुप्याशी काय संबंध आहे? हे सगळं आता मनवाच्या एन्ट्रीमुळे उघडकीस येणार आहे.

दरम्यान, कोमल कुंभारच्या कामाबद्दल बोलायचं झालं तर, तिची ‘सहकुटुंब सहपरिवार’ ही पहिलीच मालिका होती. तिची ही मालिका चांगलीच गाजली. अडीच वर्ष ‘सहकुटुंब सहपरिवार’ या मालिकेने प्रेक्षकांच्या मनावर अधिराज्य गाजवलं. १००० भागांचा टप्पा पूर्ण करून या मालिकेने गेल्या वर्षी ऑगस्ट महिन्यात प्रेक्षकांचा निरोप घेतला.