ठरलं तर मग! रोहिणी हट्टंगडी नव्या पूर्णा आजी, सेटवरचा फोटो आला समोर; म्हणाल्या, “ज्योती चांदेकर यांच्यासह जुनी मैत्री…”

पूर्णा आजीची भूमिका कोण साकारणार? याबद्दल सोशल मीडियावर बऱ्याच चर्चा सुरू होत्या. अखेर ज्येष्ठ अभिनेत्री रोहिणी हट्टंगडी पूर्णा आजीची भूमिका साकारणार असल्याचं समोर आलं आहे. स्टार प्रवाहने नुकतीच त्यांच्या सेटवरच्या एन्ट्रीची झलक शेअर केली होती. आता सायली अन् पूर्णा आजी यांचा सेटवरचा पहिला फोटो समोर आला आहे.

पूर्णा आजी म्हणजेच रोहिणी ताई म्हणाल्या, “ठरलं तर मग मालिका माझी आवडती मालिका आहे आणि मी न चुकता पाहते. याच मालिकेत मी आता पूर्णा आजीची भूमिका साकारणार आहे. मनात संमिश्र भावना आहेत. मी माझ्या आयुष्यात पहिल्यांदा कुणीतरी साकारलेली भूमिका पुढे नेणार आहे. पूर्णा आजीची भूमिका साकारणाऱ्या ज्योती चांदेकर यांच्याबरोबर माझी जुनी मैत्री होती. कधी वाटलं नव्हतं ती अशी अचानक सोडून जाईल आणि तिची भूमिका मी साकारेन. कलाकाराने ती भूमिका एका पातळीवर नेऊन ठेवलेली असते. त्या कलाकाराने केलेलं काम पुढे न्यायचं थोडं जबाबदारीचं काम आहे. माझ्याकडून मी पूर्ण प्रयत्न करणार आहे. प्रेक्षकांनी तितक्याच दिलदारपणे स्वीकारावं ही इच्छा आहे.”

पूर्णा आजीच्या एन्ट्रीने सेटवरही आनंदाचं वातावरण आहे. सगळ्या टीमने मिळून रोहिणी ताईंचं मनापासून स्वागत केलं आहे. सायली म्हणजेच अभिनेत्री जुई गडकरी म्हणाली, “पूर्णा आजीच्या रुपात रोहिणी ताईंना पाहून खूप भरुन आलं. रोहिणी ताईंबरोबर काम करताना खूप गोष्टी शिकायला मिळणार आहेत. त्यांच्या रुपात विद्यापीठच आमच्या सेटवर आलंय. रोहिणी ताई म्हणजेच पूर्णा आजीसोबत आता मालिकेची गोष्ट पुढे नेताना आनंद होतोय. तेव्हा पाहायला विसरु नका ठरलं तर मग रात्री साडेआठ वाजता फक्त स्टार प्रवाहवर.”