आर्यन खानची कोठडी वाढण्याची शक्यता; बुधवारी रात्री विदेशी ड्रग पेडलरच्या अटकेनं प्रकरणाला नवं वळण?

वांद्र्यातून विदेशी ड्रग्ज पेडलरला अटक

बुधवारी रात्री एनसीबीनं मुंबईत कारवाई करत एका विदेशी ड्रग पेडलरला अटक केली. मुंबईच्या वांद्रे परिसरातून या ड्रग पेडलरला अटक करण्यात आली असून त्याच्याकडून मोठ्या प्रमाणावर एमडी नावाचं ड्रग्ज हस्तगत करण्यात आल्याची माहिती सूत्रांनी दिली आहे. या पार्श्वभूमीवर नव्याने हाती आलेल्या धागेदोऱ्यांच्या चौकशीसाठी एनसीबीकडून आर्यन खानच्या अतिरिक्त कोठडीची मागणी केली जाण्याची शक्यता आहे. आज दुपारी यासंदर्भात सुनावणी होणार आहे.

पुन्हा जामिनासाठी अर्ज करणार

सूत्रांनी दिलेल्या माहितीनुसार, बुधवारी रात्री अटक करण्यात आलेल्या विदेशी ड्रग पेडलरचा आर्यन खान आणि त्याचा मित्र अरबाज मर्चंट यांच्याशी नियमित संपर्क होता. त्यामुळे या संबंधात आर्यन खानची चौकशी केली जाण्याची शक्यता आहे. दरम्यान, एनसीबी अतिरिक्त कोठडी मागण्याची शक्यता गृहीत धरून आर्यन खानची केस लढणारे वकील सतीष मानेशिंदे हे आज पुन्हा आर्यनसाठी जामीन अर्ज दाखल करणार असल्याची माहिती मिळत आहे.

Mumbai Rave Party: धाड बनावट असल्याच्या नवाब मलिकांच्या आरोपांना समीर वानखेडेंनी दिलं उत्तर; म्हणाले…

एनसीबीच्या कारवाईच्या सत्यतेवर प्रश्नचिन्ह?

दरम्यान, एकीकडे आर्यन खानची चौकशी आणि कोर्टात सुनावणी सुरू असताना दुसरीकडे एनसीबीनं टाकलेली ही संपूर्ण धाडच बनावट असल्याचा खळबळजनक आरोप राष्ट्रवादी काँग्रेसचे प्रवक्ते नवाब मलिक यांनी केला आहे. तर त्याला उत्तर देताना एनसीबीचे विभागीय संचालक समीर वानखेडे यांनी “आम्ही आधीच पत्रकार परिषद घेतली आहे, तरीही मला तुम्हाला सांगायचं आहे की आम्ही पंचनामा करणाऱ्या नऊ जणांचं नाव दिलं आहे. कायद्याच्या चौकटीत राहूनच सर्व कारवाई करण्यात आली आहे,” असं स्पष्टीकरण दिलं आहे.