मुंबई : मराठी चित्रपटांना जास्तीत जास्त चित्रपटगृहे उपलब्ध व्हावीत, यासाठी एक पडदा चित्रपटगृहांच्या समस्यांचा अभ्यास करण्यासाठी संबंधित खात्यांची संयुक्त समिती स्थापन करण्यात यावी, असे निर्देश सांस्कृतिक कार्यमंत्री ॲड. आशिष शेलार यांनी गुरुवारी येथे दिले.
महाराष्ट्रातील एक पडदा चित्रपटगृहांची अवस्था दयनीय असून या चित्रपटगृहांबाबत सरकारने तातडीने उपाययोजना कराव्यात, अनुदान अथवा अन्य मदत करावी, या मागणीसाठी विविध संस्था आणि चित्रपटगृह चालक-मालक संघटना, कलावंत, चित्रपट निर्माते यांनी शेलार यांना अनेक निवेदने दिली होती. त्याबाबत शेलार यांनी सांस्कृतिक कार्य विभाग, गोरेगाव फिल्म सिटी आणि संबंधित अधिकाऱ्यांची गुरुवारी बैठक घेतली. या बैठकीला चित्रपट गृह मालक संघटनेचे पदाधिकारी उपस्थित होते.
नगरविकास, गृह, महसूल,. वित्त आणि सांस्कृतिक कार्य विभाग या विभागांचे वरिष्ठ अधिकारी आणि या क्षेत्रातील तज्ञांची संयुक्त समिती स्थापन करुन याबाबत सविस्तर अभ्यास करण्यात यावा व त्याचा अहवाल दोन महिन्यात सादर करण्यात यावा. तसेच सध्या सुरु असलेली ३०० चित्रपट गृहे आणि बंद असलेल्या सर्व एक पडदा चित्रपट गृहांमध्ये मराठी चित्रपट दाखविण्यात येणार असल्यास शासन प्रोत्साहन योजना आणू शकते का? याचा ही विचार या समितीने करावा, अशा सूचना शेलार यांनी दिल्या.
दरम्यान, गोरेगाव मुंबई येथे प्रस्तावित असलेल्या नाट्यगृहाच्या विषयावरही शेलार यांनी बैठक घेतली. अभिनेते सुनील बर्वे आणि गोरेगावचे नागरिक या नाट्यगृहांसाठी आग्रही असून यासाठी स्वाक्षरी मोहीमही राबविण्यात आली होती. या प्रश्नावर महापालिका अधिकारी आणि संबधित कलावंत व स्थानिक आमदार विद्या ठाकूर यांच्या उपस्थितीत शेलार यांनी याबाबत आढावा घेतला. उपलब्ध जागा तसेच प्रस्तावित इमारतीबाबत कलावंताचे म्हणणे आदी बाबींचा विचार करुन येत्या पंधरा दिवसात संपूर्ण अहवाल सादर करण्यात यावा व लवकरात लवकर काम सुरु करावे, असे निर्देश शेलार यांनी दिले. त्याचबरोबर लावणी कलावंताच्या प्रश्नांबाबतही शेलार यांनी स्वतंत्र बैठक घेऊन त्यांच्या समस्या जाणून घेतल्या. या कलावंतांच्या समस्या सोडविण्याबाबत शेलार यांनी संबंधितांशी सविस्तर चर्चा केली.
