बॉलिवूड कलाकारांनी परदेशात केले नववर्षाचे स्वागत

वर्षभरातील चित्रीकरणाचे व्यग्र वेळापत्रक आणि प्रसिध्दी कार्यक्रम यातून वेळ काढून डिसेंबरच्या शेवटच्या आठवड्यात परदेशातील आपल्या आवडत्या ठिकाणी जायचे आणि तेथे नव्या वर्षाचे स्वागत आणि जल्लोष अनुभवायचा हा अनेक बॉलिवूड कलाकारांचा दरवर्षीचा ठरलेला बेत असतो. यंदाही बॉलिवूडमधील अनेक कलाकार नववर्षाच्या स्वागताच्या निमित्ताने परदेशात आहेत. अभिनेत्री करीना कपूर खान दरवर्षी पती सैफ अली खान आणि मुलांसह सुट्टीसाठी परदेशात फिरायला जाते. यंदा करीना नववर्षाच्या स्वागतासाठी स्वित्झर्लंडमध्ये आहे. तर ‘भुलभुलैय्या ३’ या चित्रपटाच्या यशामुळे आनंदात असलेल्या अभिनेत्री तृप्ती डिमरीने सुट्टी आणि नवीन वर्षाच्या स्वागतासाठी फिनलंडला पसंती दिली आहे. गेल्या वर्षी ‘द आर्चीज’ या चित्रपटातून पदार्पण केलेला आणि आलिया भट्टबरोबर ‘जिगरा’ चित्रपटात झळकलेल्या अभिनेता वेदांग रैनाने मालदीवमध्ये नवीन वर्षाचे स्वागत केले.

हेही वाचा…उच्च न्यायालयातील वकिलाची दीड कोटींची सायबर फसवणूक

स

अभिनेत्री शिल्पा शेट्टीही आपल्या कुटुंबाबरोबर दरवर्षी वेगवेगळ्या ठिकाणी सु्ट्टी घालवण्यावर भर देते. यंदा डिसेंबरमध्ये नाताळच्या आसपास लंडनमध्ये पोहोचलेल्या शिल्पाने हाईड पार्क येथे होणाऱ्या ‘विंटर वंडरलँड’ या वार्षिक जत्रेचाही आनंद घेतला. नोव्हेंबर ते जानेवारी दरम्यान भरणाऱ्या या विंटर वंडरलँडला भेट देत आपल्या मुलांबरोबरची छायाचित्रेही तिने समाजमाध्यमांवर टाकली. नुकतीच विवाहबध्द झालेली अभिनेत्री सोनाक्षी सिन्हा हिने पती झहीर इक्बालबरोबर ऑस्ट्रेलियात सुट्टी घालवली. सिडनी येथे नववर्षाचे स्वागत करतानाची छायाचित्रेही तिने समाजमाध्यमांवर टाकली होती. या छायाचित्रांमुळे तिच्यावर टीकाही झाली. दिवाळीत मुंंबईतील फटाक्यांच्या आतषबाजीची छायाचित्रे समाजमाध्यमांवर टाकत तिने फटाके फोडून प्रदूषण केले जाते म्हणून टीका केली होती. मात्र सिडनीत नववर्षाच्या निमित्ताने झालेल्या फटाक्यांच्या आतषबाजीची छायाचित्रे कौतुकाने टाकणाऱ्या सोनाक्षीवर चाहत्यांकडून टीका करण्यात आली. अभिनेत्री तमन्ना भाटियाने टेक्सासमध्ये तर अभिनेत्री दिया मिर्झाने आपल्या मुलांबरोबर श्रीलंंकेत नववर्षाचे स्वागत केले. तर सध्या अभिनेता धनुषबरोबरच्या वादामुळे आणि नेटफ्लिक्सवरील वेबमालिकेमुळे चर्चेत असलेली दाक्षिणात्य अभिनेत्री नयनतारा, पती विघ्नेश आणि अभिनेता आर. माधवन आणि त्याची पत्नी यांनी एकत्र दुबईत नववर्षाचे स्वागत केले. अजय देवगण-काजोल, रणबीर-आलिया अशा अनेक बॉलिवूड कलाकार इथेच कुटुंबाबरोबर एकत्रित नववर्षाच्या स्वागतात सहभागी झाले होते.