Maharashtra Weather News: कोकणासह मध्य महाराष्ट्र, विदर्भात पावसाचा इशारा

नैऋत्य बंगालच्या उपसागरात ‘मोंथा’ चक्रीवादळाची निर्मिती झाली आहे. हे चक्रीवादळ मंगळवारपर्यंत उपसागरात नैऋत्य आणि पूर्वमध्य भागात वायव्येकडे सरकण्याची शक्यता आहे. ही प्रणाली मंगळवारी रात्री आंध्रप्रदेशकडे सरकणार आहे. मोंथा चक्रीवादळाच्या प्रभावामुळे पुढील दोन दिवस विदर्भातील काही भागात मुसळधार पावसाची शक्यता आहे. या चक्रीवादळाचा राज्यावर कोणताही परिणाम होणार नसल्याचे हवामान विभागाने स्पष्ट केले आहे. दरम्यान, सोमवारी देखील मुंबईत पावसाने हजेरी लावली. फोर्ट, भायखळा, दादर, वरळी, परळ, भायखळा, घाटकोपर, अंधेरी, बोरिवली भागात सायंकाळी ६ नंतर पाऊस पडत होता. दिवसभर उन्हाचे चटके आणि असह्य उकाडा सहन केल्यानंतर सायंकाळी पडलेल्या पावसामुळे मुंबईकरांना काहीसा दिलासा मिळाला. पावसामुळे कमाल तापमानातही घट झाली आहे. हवामान विभागाच्या कुलाबा केंद्रात सोमवारी ३१.२ अंश सेल्सिअस, तर सांताक्रूझ केंद्रात ३३.५ अंश सेल्सिअस कमाल तापमानाची नोंद झाली. मागील काही दिवसांच्या तुलनेत तापमानात घट झाली आहे. मात्र, आर्द्रतेमुळे असह्य उकाडा सहन करावा लागत आहे.

पावसाची शक्यता कुठे

अतिमुसळधार पाऊस

यवतमाळ, चंद्रपूर, गडचिरोली

हलक्या सरींसह ढगाळ वातावरण

छत्रपती संभाजीनगर, जालना, परभणी, नांदेड, हिंगोली, बीड

मेघगर्जनेसह पाऊस

मुंबई, ठाणे, पालघर, रायगड, रत्नागिरी, सिंधुदुर्ग, नाशिक, पुणे, अहिल्यानगर, कोल्हापूर, सातारा,

शक्ती चक्रीवादळानंतर आता मोंथा

शक्ती’ चक्रीवादळ हे २०२५ मधील पहिलेच गुजरात आणि पाकिस्तानच्या किनाऱ्यालगत तयार झालेले चक्रीवादळ होते. त्यानंतर आता रविवारी नैऋत्य बंगालच्या उपसागरात ‘मोंथा’ चक्रीवादळाची निर्मिती झाली आहे. मोंथा चक्रीवादळ आंध्रप्रदेशकडे सरकणार असल्याने त्याचा राज्यावार कोणताही परिणाम होणार नसल्याचे हवामान विभागाने सांगितले.

यापूर्वी फेंगल चक्रीवादळ

गेल्या वर्षी नोव्हेंबर महिन्यात बंगालच्या उपसागरात ‘फेंगल’ चक्रीवादळ तयार झाले होते. ३० नोव्हेंबर रोजी ‘फेंगल’ तमिळनाडूच्या किनाऱ्याला धडकले होते. त्यानंतर ११ महिन्यानंतर आता ‘शक्ती’ चक्रीवादळाची निर्मिती झाली आहे. फेंगलचा फटका उत्तर तमिळनाडू आणि पुद्दुचेरीला बसला होता. अनेक भागात पूरस्थिती निर्माण झाली होती.