सात मद्यपी एसटी कर्मचाऱ्यांवर कठोर कारवाई

परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिलेल्या निर्देशानुसार एसटी महामंडळाच्या सुरक्षा आणि दक्षता खात्याने २८ ऑक्टोबर रोजी राज्यभरातील सर्व विभागांमध्ये कार्यरत असलेले चालक, वाहक आणि यांत्रिक कर्मचाऱ्यांच्या मद्यपान तपासणीची एक मोठी आणि अचानक धाड मोहीम राबविली. या अचानक केलेल्या तपासणी मोहिमेमुळे महामंडळात एकच खळबळ उडाली. या कारवाईत संशयास्पद एकूण ७१९ चालक, ५२४ वाहक आणि ४५८ यांत्रिक कर्मचारी व इतर कर्मचारी अशा सुमारे १,७०१ कर्मचाऱ्यांची तपासणी करण्यात आली. या कारवाईत दोषी आढळलेल्या ७ कर्मचाऱ्यांवर दोषारोप निश्चित करण्यात आला आहे. त्यामध्ये एक स्वच्छता कर्मचारी, एक वाहक, २ चालक, ३ यांत्रिक कर्मचारी निलंबित केले आहेत.

तपासणीचा तपशील

• धुळे विभागाच्या तपासणीत एक यांत्रिक कर्मचारी, एक स्वच्छता कर्मचारी आणि एक चालक मद्यपान करताना आढळले.
• नाशिक येथील तपासणीमध्ये एक चालक, नांदेड विभागामध्ये एक वाहक, परभणी आणि भंडारा विभागात प्रत्येकी एक यांत्रिक कर्मचारी मद्यपान करून काम करताना आढळले.
• एसटी महामंडळाने या सात कर्मचाऱ्यांवर पुढील कार्यवाही सुरू केली असून, या मोहिमेचा अहवाल तातडीने मुंबई येथील मध्यवर्ती कार्यालयात सादर केला जाणार आहे.

भविष्यात कठोर कारवाईचा इशारा

या घटनेनंतर सुरक्षा आणि दक्षता खात्याने भविष्यात कठोर कारवाई करण्याचा इशारा दिला आहे. यापुढे अशा प्रकारची अचानक आणि वारंवार तपासणी मोहीम संपूर्ण महामंडळात राबविण्यात येणार आहे. जर कर्मचारी मद्यपान करून कर्तव्यावर आढळून आल्यास, त्याच्यावर कठोर कारवाई करण्यात येईल, अशा सूचना प्रताप सरनाईक यांनी एसटी महामंडळाच्या वरिष्ठ अधिकाऱ्यांना दिल्या आहेत.

नवीन एसटी बसमध्ये ‘ब्रेथ ॲनलायझर’

प्रवाशांची सुरक्षा ही एसटी महामंडळाची सर्वोच्च प्राथमिकता आहे. भविष्यात ताफ्यात दाखल होणाऱ्या नव्या बसगाड्यांमध्ये चालकाच्या समोर ब्रेथ ॲनालायझर (श्वासोच्छवास यंत्र) बसविण्यात येणार असून त्यामुळे प्रवाशांच्या जीवाशी खेळणाऱ्या मद्यपी चालकांना अटकाव होईल. अर्थात, या कारवाईमुळे सार्वजनिक वाहतूक व्यवस्थेतील गैरव्यवहारांना आळा बसेल, अशी अपेक्षा सरनाईक यांनी व्यक्त केली.