मुंबई : गेल्या अनेक वर्षांपासून प्रलंबित असलेल्या विविध मागण्यांच्या पूर्ततेसाठी पुन्हा एकदा एसटी कर्मचाऱ्यांनी आक्रमक भूमिका घेतली असून ऐन दिवाळीच्या तोंडावर एसटी कर्मचाऱ्यांनी आंदोलन करण्याची तयारी सुरू केली आहे. यासाठी भाजप, शिवसेना ठाकरे गट, शिवसेना शिंदे गट प्रणित एसटी कर्मचारी संघटना एकत्र आल्या आहेत. मागण्यांची पूर्तता करण्यासाठी राज्य सरकार, एसटी महामंडळाविरोधात आंदोलन करण्यात येणार आहे. यामुळे ऐन दिवाळीत प्रवाशांचे हाल होण्याची चिन्हे आहेत.
एसटी कामगारांना दिवाळीनिमित्त १५ हजार रुपये भेट आणि कामगार कराराच्या तरतुदीनुसार एसटी कामगारांना दिवाळीनिमित्त १२,५०० रुपये सण उचल देण्यात यावी, एसटीचे टप्प्याटप्प्याने सुरू असलेले खासगीकरण बंद करावे, कंत्राटी भरती बंद करावी, सार्वजनिक-खासगी भागीदारी (पीपीपी) तत्वावर महामंडळाच्या जागांचा विकास करण्याऐवजी महामंडळाने ही जागा स्वतः विकसित करावी आदी मागण्या महाराष्ट्र एस.टी. कामगार संयुक्त कृती समितीने केल्या आहेत. या मागण्या मान्य न झाल्यास एसटी कर्मचारी १३ ऑक्टोबरपासून आंदोलन करतील. सुरुवातीला मुंबई सेंट्रल येथील एसटीच्या मध्यवर्ती कार्यालयासमोर धरणे आंदोलन करण्यात येईल. त्यानंतर, राज्यभरात काम बंद आंदोलन केले जाईल, असा इशारा देण्यात आला आहे.
कामगार कराराच्या तरतुदीनुसार एसटी कामगारांना राज्य शासकीय कर्मचाऱ्यांप्रमाणे महागाई भत्ता, घरभाडे भत्ता व वार्षिक वेतनवाढीचा दर लागू करण्याचे मान्य केले आहे. असे असताना घरभाडे भत्ता व वार्षिक वेतनवाढीच्या दरामध्ये एकतर्फी कपात करून कामगार कराराच्या तरतुदीचा एसटी प्रशासनाने भंग केला आहे. मुंबई औद्योगिक न्यायालयाने थकबाकी देण्याचा निर्णय देऊनही प्रशासनाकडून त्याची अंमलबजावणी केली जात नाही. थकबाकी, महागाई भत्ता या आर्थिक मागण्या प्रलंबित आहे. याबाबत ठोस निर्णय घेऊन त्याची तत्काळ अमलबजावणी करावी. अन्यथा राज्य सरकारमुळे एसटी कर्मचाऱ्यांसह प्रवाशांचे हाल होतील, असा इशारा महाराष्ट्र एसटी कामगार संयुक्त कृती समितीने दिला आहे.
एसटी कर्मचाऱ्यांसाठी सर्व पक्ष, विचारसरणीच्या संघटना एकवटल्या
एसटी महामंडळातील विविध पक्षाच्या आणि विचारांच्या संघटना एसटी कामगारांच्या हितासाठी एकत्र आल्या आहेत. यात शिवसेना (ठाकरे) प्रणित महाराष्ट्र एसटी कामगार सेना, शिवसेना (शिंदे) प्रणित शिव परिवहन वाहतूक सेना, भाजपप्रणित महाराष्ट्र मोटार कामगार फेडरेशन, कॉंग्रेसप्रणित महाराष्ट्र एसटी कर्मचारी काँग्रेस संघटना एका छताखाली आल्या आहेत.
तसेच महाराष्ट्र एसटी कामगार संघटना, कास्ट्राईब राप कर्मचारी संघटना, महाराष्ट्र मोटार कामगार फेडरेशन, बहुजन राज्य परिवहन कर्मचारी संघटना, महाराष्ट्र परिवहन मजदूर युनियन, राष्ट्रीय एसटी कामगार काँग्रेस (इंटक), बहुजन परिवहन अधिकारी – कर्मचारी संघटना, महाराष्ट्र राष्ट्रीय मुलनिवासी बहुजन कर्मचारी संघ व राष्ट्रीय एसटी कामगार काँग्रेस या संघटना महाराष्ट्र एसटी कामगार संयुक्त कृती समितीमध्ये समावेश आहे.
