मुंबई : मध्य रेल्वेवरील माटुंगा – मुलुंड अप आणि डाऊन जलद मार्गावर विविध अभियांत्रिकी आणि देखभालीची कामे करण्यासाठी रविवारी मेगाब्लाॅक घेण्यात येणार आहे. पश्चिम रेल्वेवर बोरिवली – भाईंदर स्थानकांदरम्यान शनिवारी रात्रकालीन ब्लाॅक घेण्यात येणार आहे. तर, रविवारी दिवसकालीन कोणताही ब्लाॅक नसेल.
मध्य रेल्वे
मुख्य मार्ग
कुठे : माटुंगा – मुलुंड अप आणि डाऊन जलद मार्गावर
कधी : रविवारी सकाळी ११.०५ ते दुपारी ३.५५ वाजेपर्यंत
परिणाम : सीएसएमटीवरून सुटणाऱ्या डाऊन जलद मार्गावरील लोकल माटुंगा आणि मुलुंड स्थानकांदरम्यान डाऊन धीम्या मार्गावर वळवण्यात येतील. ठाण्यापुढील जलद लोकल मुलुंड येथून डाऊन जलद मार्गावर वळवण्यात येतील. ठाणे येथून सुटणाऱ्या अप जलद मार्गावरील सेवा मुलुंड आणि माटुंगा स्थानकांदरम्यान अप धीम्या मार्गावर वळवण्यात येतील. माटुंगा येथे अप जलद मार्गावर वळवण्यात येतील.
हेही वाचा >>>मुंबई : अल्पवयीन मुलींना वेश्याव्यवसाय करण्यास भाग पाडणारी महिला अटकेत
हार्बर मार्ग
कुठे :पनवेल- वाशी अप आणि डाऊन मार्गावर
कधी : रविवारी सकाळी ११.०५ ते दुपारी ४.०५ वाजेपर्यंत
परिणाम : ब्लाॅक कालावधीत सीएसएमटी – बेलापूर / पनवेल अप आणि डाऊन लोकल सेवा रद्द असतील. ठाणे – पनवेल अप आणि डाऊन लोकल सेवा बंद राहील. ब्लॉक कालावधीत सीएसएमटी – वाशी दरम्यान विशेष लोकल धावतील. ठाणे – वाशी / नेरूळ स्थानकांदरम्यान आणि बेलापूर / नेरूळ आणि खारकोपर स्थानकांदरम्यान लोकल सेवा सुरू असेल.
पश्चिम रेल्वे
कुठे : बोरिवली – भाईंदर अप आणि डाऊन धीम्या मार्गावर
कधी : शनिवारी रात्री १२.३५ ते पहाटे ४.३५ वाजेपर्यंत
परिणाम : ब्लाॅक कालावधीत सर्व धीम्या मार्गावरील लोकल सेवा विरार / वसई रोड – बोरिवली / गोरेगाव दरम्यान जलद मार्गावर चालवण्यात येतील. तर, विरार दिशेकडे जाणाऱ्या सर्व डाऊन धीम्या लोकल गोरेगाव – वसई रोड / विरार दरम्यान डाऊन जलद मार्गावर वळवण्यात येतील. पश्चिम रेल्वेवर दिवसकालीन कोणताही ब्लाॅक नसेल.
