मुंबई: उपचाराच्या बहाण्याने १६ वर्षीय मुलीचा विनयभंग करणाऱ्या डॉक्टरला शिवाजी नगर पोलिसांनी अटक केली. आरोपीविरोधात विनयभंग व पोक्सो कायद्या अंतर्गत गुन्हा दाखल करण्यात आला असून याप्रकरणी शिवाजी नगर पोलीस अधिक तपास करत आहेत. गोवंडी परिसरात हा प्रकार घडला.
पीडित मुलीच्या छातीत दुखत असल्यामुळे ती परिसरातील नर्सिंग होममध्ये उपचारासाठी गेली होती. त्यावेळी तपासण्याच्या बहाण्याने आरोपीने तिला अश्लीलरित्या स्पर्श केला. सुरूवातीला पीडित मुलीने दुर्लक्ष केले पण त्यानंतर त्याने पीडित मुलीच्या कपड्यांना हात घातला. त्यामुळे पीडित मुलगी घाबरली. आरोपीने घडलेला प्रकार कोणालाही न सांगण्याची पीडित मुलीला धमकी दिली. या प्रकारामुळे घाबरलेल्या पीडित मुलीला तपासणीसाठी घाटकोपर येथील राजावाडी रुग्णालयात नेण्यात आले होते.
पीडित मुलीने हा प्रकार कुटुंबियांना सांगितला. त्यानुसार याप्रकरणी डॉक्टर विरोधात पोलिसांकडे तक्रार करण्याचा निर्णय घेण्यात आला. त्यानंतर मुलीने याप्रकरणी शिवाजीनगर पोलिसांकडे तक्रार केली. पोलिसांनी याप्रकरणी भारतीय न्याय संहिता ७५ व पोक्सो कायद्या अंतर्गत आरोपी डॉक्टरविरोधात गुन्हा दाखल केला. त्यानंतर आरोपी डॉक्टरला याप्रकरणी पोलिसांनी अटक केली. आरोपी डॉक्टरला याप्रकरणी तात्काळ अटक करण्यात आल्याची माहिती पोलिसांनी दिली. याप्रकरणी शिवाजीनगर पोलीस अधिक तपास करत आहेत.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ पोक्सो कायद्या अंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्या अंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे.
२०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याच्या प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घडनांमध्ये बहुसंख्य आरोपी परिचीत व्यक्त आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
