जेव्हा अमेरिकन संसदेत ‘नाफा’ मराठी चित्रपट महोत्सवाबद्दल माहिती दिली जाते…

यंदा हॉलिवूडच्या धर्तीवर सॅनहोजे येथे २५, २६ आणि २७ जुलै या कालावधीत दुसरा ‘नाफा’ मराठी चित्रपट महोत्सव होणार आहे. या पार्श्वभूमीवर ‘नाफा’ मराठी चित्रपट महोत्सवाची अमेरिकन संसदेने दखल घेतली आहे. अमेरिकेतील मराठी खासदार श्री ठाणेदार यांनी अमेरिकन संसदेतील सभागृहात ‘नाफा’ महोत्सवाची आणि आयोजक अभिजीत घोलप यांची माहिती देऊन शुभेच्छा दिल्या आहेत. याप्रसंगी अमेरिकन संसदेत ‘नाफा’ मराठी चित्रपट महोत्सवाचा फलकही लावण्यात आला होता.

‘नाफा’ मराठी चित्रपट महोत्सवाबद्दल अमेरिकन संसदेत माहिती देताना श्री ठाणेदार म्हणाले की, ‘मॅडम स्पीकर, मराठी चित्रपटांची चळवळ जगभर पोहोचवण्यासाठी ‘नाफा’ या संस्थेची मुहूर्तमेढ रोवण्यात आली. नॉर्थ अमेरिकेत या संस्थेच्या माध्यमातून मराठी चित्रपट, कला आणि महाराष्ट्रातील समृद्ध व विविधतेने नटलेल्या मराठी संस्कृती, परंपरांचे जतन आणि संवर्धन करण्याचे कार्य केले जात आहे. ‘नाफा’च्या माध्यमातून अभिजित घोलप महाराष्ट्र आणि नॉर्थ अमेरिकेसाठी सांस्कृतिक दुवा ठरत आहेत, ‘नाफा’ महोत्सवासाठी माझ्यासारख्या मराठी खासदाराकडून खूप खूप शुभेच्छा’.

‘नाफा’मध्ये यावर्षी २५ ते २७ जुलै रोजी सॅन होजे येथील ‘द कॅलिफोर्निया थिएटर’मध्ये भव्य मराठी चित्रपट महोत्सवाला सुरुवात होईल. २५ जुलैला ‘चित्रपट पुरस्कार संध्या’ रंगणार असून २६ व २७ जुलैला महोत्सवासाठी निवडलेल्या पाच मराठी चित्रपटांचे ‘वर्ल्ड प्रीमिअर शोज’, त्यासोबत १६ लघुपटाचे प्रीमिअर, ‘स्टुडंट्स सेक्शन’, ‘मास्टर क्लासेस’, ‘मीट ॲण्ड ग्रीट’, ‘लाईव्ह परफॉर्मन्सेस’ आणि बरेच काही या महोत्सवात असणार आहे. मराठी कलाकारांसोबत हॉलिवूडमधील दिग्गजांचीही उपस्थिती महोत्सवात असणार आहे. ‘स्नोफ्लॉवर’, ‘संत ज्ञानेश्वरांची मुक्ताई’, ‘छबीला’, ‘प्रेमाची गोष्ट २’ आणि ‘रावसाहेब’ या चित्रपटांचे ‘नाफा’ महोत्सवात वर्ल्ड प्रीमिअर होणार आहेत.

सुप्रसिद्ध अभिनेते डॉ. मोहन आगाशे, अमोल पालेकर, सचिन खेडेकर, महेश कोठारे, अश्विनी भावे, संध्या गोखले, सोनाली कुलकर्णी, गजेंद्र अहिरे, स्वप्नील जोशी, अवधूत गुप्ते, आदिनाथ कोठारे, वैदेही परशुरामी आणि मधुर भांडारकर हे प्रमुख कलाकार या महोत्सवास उपस्थित राहणार आहे. ‘नाफा’ महोत्सवासाठी अमेरिकेतील ‘बीएमएम’च्या ५७ महाराष्ट्र मंडळांचे सहकार्य लाभले आहे.

‘नाफा फिल्म फेस्टिवल २०२५’च्या निमित्ताने अमेरिकेतील मराठी खासदार श्री ठाणेदार यांनी आमचे कार्य अमेरिकन संसदेत प्रकाशमान केले आहे. आम्ही त्यांचे विशेष आभारी असून, त्यामुळे आमचा हुरूप अधिक वाढला आहे. कॅलिफोर्नियातील सॅन होजेचे महापौर मॅट महन, महाराष्ट्र राज्याचे सांस्कृतिक मंत्री ॲड. आशिष शेलार, श्री ठाणेदार आणि महाराष्ट्रातून या सोहळ्यासाठी खास येणाऱ्या सर्व कलावंतांच्या उपस्थितीमुळे हा सोहळा विशेष ठरेल’, असे ‘नाफा’चे संस्थापक अध्यक्ष अभिजित घोलप म्हणाले.