Saif Ali Khan Attacked : तलावात दीड तास शोधाशोध अन् पोलिसांच्या हाती मोठा पुरावा; सैफ अली खान हल्ला प्रकरणात महत्वाची माहिती समोर

सैफ अली खानवर हल्ला करणाऱ्या हल्लेखोराला पोलिसांनी अटक केली आहे. मोहम्मद शरीफुल इस्लाम शहजाद असं या हल्लेखोराचं नाव आहे. पोलीस आता आरोपीची चौकशी करत असून सैफ अली खानवर हल्ला करण्याचा हेतू काय? ही घटना नेमकं कशी घडली? या घटनेमागे कोणाचा हात आहे का? अशा वेगवेगळ्या पद्धतीने पोलिसांकडून तपास करण्यात येत आहे. तसेच आरोपीच्या विरुद्ध पोलीस आवश्यक ते सर्व पुरावे गोळा करत आहेत. तसेच सैफ अली खानवर हल्ला करताना आरोपीने वापरलेल्या चाकूचा एक तुकडा पोलिसांना मिळून आला आहे.

दरम्यान, पोलिसांनी आरोपी मोहम्मद शहजादला घेऊन मुंबईतील वांद्रे तलावाजवळ जवळपास दीड ते दोन तास शोध मोहिम राबवली.आरोपीने चाकूचा एक भाग तलावाजवळ फेकल्याचा संशय पोलिसांना आला होता. त्यानंतर पोलिसांनी शोध मोहिम होती घेतली आणि पोलिसांना एक महत्वाचा पुरावा हाती लागला. चाकूचा एक तुकडा या ठिकाणी पोलिसांना मिळाला असून मुंबई पोलिसांनी तो जप्त केला. हा चाकूचा तुकडा पुराव्यासाठी महत्वाचा ठरणार आहे. यासंदर्भातील वृत्त इंडिया टुडेनी दिलं आहे.

दरम्यान, सैफ अली खानवर हल्ला केल्यानंतर आरोपीने चाकूचा एक तुकडा फेकून दिला होता. त्यामुळे आरोपी मोहम्मद शहजादने चाकूचा तुकडा नेमके कुठे फेकला? याचा तपास पोलीस करत होते. यानंतर पोलिसांनी आरोपीची चौकशी केली असता आरोपीने तलावात फेकल्याची माहिती दिली. त्यानंतर पोलिसांनी चाकूचा तुकडा जप्त केला आहे.