विशेष चाहतीच्या हास्यासाठी ‘इन्स्पेक्टर मंजू’चा सातारा ते मुंबई प्रवास

प्रेक्षक सत्या – मंजूला कुटुंबातील सदस्य समजून त्यांच्यावर भरभरून प्रेम करीत आहेत. याआधी ८४ वर्षांचे आजोबा सत्या – मंजूची गोष्ट खरी असल्याचे समजून थेट सेटवर पोहोचले होते. याप्रमाणे जोगेश्वरी परिसरात राहणारी श्रिया मालिकेतील पात्रांना आपले खरे मित्र समजते. मालिकेत मंजूला गोळी लागल्यापासून श्रिया अस्वस्थ झाली होती आणि नेहमी साताऱ्याला जाण्याचा हट्ट आईबाबांकडे करीत असते. हेच जाणून श्रियाला बरे वाटावे म्हणून मालिकेतील कलाकार सत्या आणि मंजूने थेट तिच्या घरी पोहोचून खास सरप्राईज दिले. कलाकारांना समोर पाहताच श्रिया आनंदाने भारावून गेली. यावेळी सत्या-मंजूने तिला एक सुंदर फोटोफ्रेम भेट म्हणून दिली, ज्यात त्यांचा आणि श्रियाचा फोटो आहे.

श्रियाबद्दल सांगताना तिचे बाबा यशवंत नाईक म्हणाले की, ‘श्रिया सन मराठी वाहिनीवरील सर्व मालिका बघते. तिला सगळ्यात जास्त ‘इन्स्पेक्टर मंजू’ ही मालिका आवडते. जेव्हाही आम्ही तिला घरात ओरडतो तेव्हा ती आम्हाला म्हणते मी माझ्या सत्या- मंजूकडे जाईन. मालिकेत मंजूला गोळी लागण्याचा प्रसंग पाहून श्रिया घाबरली. ती बेचैन होऊन मला साताऱ्याला जायचे असल्याचा हट्ट तिने आमच्याकडे केला. या मालिकेतील मंजूमुळे ती अजून खंबीर झाली आहे. आता तिचे एक स्वप्न पूर्ण झालं आहे. तिचे हास्य पाहून आम्ही समाधानी आहोत’.

मंजूची भूमिका साकारणारी अभिनेत्री मोनिका राठी म्हणाली की, ‘मंजूला मिळणार हे प्रेम पाहून मी निःशब्द आहे. सातारा ते मुंबई हा प्रवास पहिल्यांदा फार वेगळा होता. कारण आज मी आणि सत्या आमच्या एका चाहतीला भेटण्यासाठी मुंबईला आलो आहोत. श्रिया आमच्या मालिकेतील प्रत्येक पात्रावर भरभरून प्रेम करते. प्रत्येक भाग तिने बारकाईने पाहिला आहे. ती म्हणाली, ‘मम्मीसाहेबांना मी चांगलाच धडा शिकवेन’ हे वाक्य ऐकून मला धक्का बसला. कारण ती मालिकेत इतकी गुंतली आहे. ती डाऊन सिंड्रोम या आजारात आहे आणि या सगळ्यात ती मंजूला तिची खास मैत्रीण मानते. हे सर्व ऐकून आणि आज प्रत्यक्षात तिला भेटून मी भरून पावले. श्रियाचा हा आनंद असाच रहावा हीच देवाकडे माझी प्रार्थना आहे आणि ‘इन्स्पेक्टर मंजू’वर प्रेक्षकांचे हे प्रेम कायम रहावे’.