“प्रिय निलू बाळा, तू अत्यंत कळकळीने…”, निलेश राणेंच्या सुप्रिया सुळेंवरील ‘त्या’ टीकेला सुषमा अंधारेंचं प्रत्युत्तर, म्हणाल्या…

सुषमा अंधारे म्हणाल्या, “प्रिय निलू बाळा, तू अत्यंत कळकळीने लिहिलेस म्हणून, हिंदुत्ववादी आहोत म्हणत केंद्रात भाजपा अन् राज्यात ईडी सरकार आले. तरीही शिवसेनाभवनच्या समोर हिंदुत्वासाठी आक्रोशमोर्चा काढावा लागत असेल, तर याचा अर्थ विद्यमान सरकार हे हिंदुत्वविरोधी आहे. त्यामुळे ते बदलावेच लागेल नाही का?”

निलेश राणे काय म्हणाले होते?

निलेश राणेंनी सुप्रिया सुळेंच्या बारामती लोकसभा मतदारसंघातील समस्या न सुटल्यास आंदोलन करणार असल्याच्या इशाऱ्यावर टीका करत म्हटलं, “या ठिकाणी ६ पैकी २ आमदार राष्ट्रवादी काँग्रेसचे आहेत. अजित पवार अनेक वेळा पालकमंत्री राहिले आहेत. शरद पवार स्वतः बारामतीचे किंम जॉन्ग आहेत. स्थानिक स्वराज्य संस्था राष्ट्रवादी काँग्रेसच्या ताब्यात आहे. एवढं असून जर आंदोलन करावं लागतं, तर बारामतीचे खासदारच बदलावे लागतील.”

हेही वाचा : VIDEO: संजय राऊतांच्या ‘चोरमंडळ’ वक्तव्याला पाठिंबा की विरोध? सुषमा अंधारे स्पष्टच म्हणाल्या,”चोर के दाढी में…”

निलेश राणेंच्या टीकेला राष्ट्रवादी काँग्रेसचं प्रत्युत्तर

निलेश राणेंच्या या वक्तव्यावर राष्ट्रवादी काँग्रेसच्या नेत्यांनीही प्रत्युत्तर दिलं. महाराष्ट्र राष्ट्रवादी काँग्रेसच्या सरचिटणीस अदिती नलवडे यांनी निलेश राणेंच्या ट्वीटवर एक व्हिडीओ पोस्ट करत टीका केली.

हा व्हिडीओ पोस्ट करताना त्यांनी निलेश राणेंना ‘ज्युनियर थापा’ असं म्हटलं. तसेच व्हिडीओत सुप्रिया सुळेंचं काम निलेश राणेंच्या तुलनेत कसं प्रभावी आहे, हे सांगितलं.