मुंबई : मुंबई शहर आणि उपनगरात सोमवारी सायंकाळपासून पावसाला सुरुवात झाली. मंगळवारी सकाळपासून पावसाने जोर धरला आहे. दरम्यान, पुढील काही तासांत पावसाचा जोर आणखी वाढण्याची शक्यता हवामान विभागाने वर्तवली आहे. या कालावधीत मुसळधार पाऊस कोसळून काही भागात पाणी साचण्याची शक्यता आहे. हवामान विभागाने सकाळी जारी केलेल्या सुधारित अंदाजानुसार मुंबईला मुसळधार पावसाचा इशारा देण्यात आला आहे.
मुंबईत मागील तीन – चार दिवसांपासून पावसाची रिपरिप सुरू आहे. शहर, तसेच उपनगरात सोमवारीही दिवसभर हलक्या सरी बरसल्या. त्यानंतर सोमवारी रात्री पावसाचा जोर वाढला. नरिमन पॉइंट, दादर, वरळी, परळ, शीव, कुर्ला याचबरोबर घाटकोपर, पवई, भांडूप या परिसरात सोमवारी मध्यरात्रीपासून पाऊस कोसळत आहे. अनेक भागात मंगळवारी सकाळपासून पाऊस पडत आहे. दरम्यान, पुढील काही तासांत मुंबईत पावसाचा जोर वाढण्याची शक्यता आहे.
या कालावधीत सोसाट्याच्या वाऱ्यासह पाऊस पडेल. त्यामुळे नागरिकांनी सतर्क राहावे, असे आवाहन हवामान विभागाने केले आहे. प्रामुख्याने दक्षिण मुंबईत पावसाचा जोर राहील. हवामान विभागाच्या कुलाबा केंद्रात सोमवारी सकाळी ८:३० ते मंगळवारी सकाळी ८:३० वाजेपर्यंत १२.२ मिमी, तर सांताक्रूझ केंद्रात ३८.२ मिमी पावसाची नोंद झाली.
ठाणे, नवी मुंबईत मुसळधार
ठाणे आणि नवी मुंबई परिसरातही सोमवारपासून पावसाने जोरदार हजेरी लावली आहे. या भागात पावसाचा जोर अधिक होता. अधूनमधून वारे वाहत होते. मंगळवारी पहाटेपासून पुन्हा या भागात पावसाने जोर धरला आहे.
कमी दाबाचा पट्टा सक्रिय
बंगालच्या उपसागराचा दक्षिण भाग आणि आसपासच्या परिसरात कमी दाबाचा पट्टा आणि चक्राकार वाऱ्यांची स्थिती निर्माण झाली आहे. त्यामुळे देशभरात पावसाचे प्रमाण हे कमी-जास्त आहे. कमी दाबाचा पट्टा आणि वाऱ्याची प्रणाली उत्तर – पश्चिमेकडेकडे सरकेल तसा उत्तरेकडील राज्यात पावसाचा जोर वाढेल.
हवामान विभागाचा अंदाज फोल
हवामान विभागाने सोमवारपासून पुढील दोनन- तीन दिवस मुंबईसह कोकण आणि इतर भागात हलक्या ते मध्यम सरींचा अंदाज व्यक्त केला होता. मात्र, हा अंदाज फोल ठरवत सोमवारी मुंबईत दिवसभर पाऊस पडला. त्यानंतर रात्री काहीं प्रमाणात पावसाचा जोर वाढला. मंगळवारी सकाळपासून मुंबईत पाऊस पडत आहे. अनेक भागात गडगडाटासह पावसाने हजेरी लावली आहे.
