मांसबंदीचा वाद आताच का निर्माण झाला? – उद्धव ठाकरेंचा सवाल

जैन बांधव गेल्या अनेक वर्षांपासून पर्युषण पर्व पाळतात. मग याचवेळी मांसबंदीवरून वाद का निर्माण झाला, असा सवाल शिवसेना पक्षप्रमुख उद्धव ठाकरे यांनी रविवारी विचारला.
मांसबंदीवरून सुरू असलेल्या वादाच्या पार्श्वभूमीवर जैन धर्मगुरूंनी रविवारी मातोश्रीवर जाऊन उद्धव ठाकरे यांची भेट घेतली. या भेटीनंतर उद्धव ठाकरे यांनी पत्रकारांशी संवाद साधला. ते म्हणाले, आमच्याकडून या वादावर आधीच पडदा टाकण्यात आला आहे. जैन बांधव अनेक वर्षांपासून पर्युषणपर्व पाळतात. पण, याच वर्षी मांसबंदीवरून वाद का निर्माण झाला, याचाही विचार सर्वांनी केला पाहिजे. आम्ही कोणत्याही धर्माविरोधात नाही, असेही त्यांनी सांगितले.
पर्युषण पर्व पाळण्यास शिवसेनेचा विरोध कधीही नव्हता. सक्तीच्या शाकाहाराची भूमिका मान्य नव्हती; पण आता शिवसेनेच्या दृष्टीने हा विषय संपला असून तो आम्हाला अधिक वाढवायचा नाही, असे उद्धव ठाकरे यांनी आधीच म्हटले आहे.