अकोला : पश्चिम विदर्भातील पहिले ब्रिटिशकालीन शिवणी विमानतळावरून हवाई सेवा सुरू होण्यासाठी धावपट्टी विस्तार आवश्यक आहे. धावपट्टीच्या विस्तारासाठी आवश्यक भूसंपादन निधी अभावी रखडले. अमरावती जिल्ह्यातील बेलोरा विमानतळावरून हवाई वाहतूक सुरू झाल्यानंतर अकोल्यातील शिवणी विमानतळाचा प्रश्न देखील मार्गी लावू, असा शब्द मुख्यमंत्री देवेंद्र फडणवीसांनी अकोलेकरांना दिला. त्यानंतर हालचालींना वेग आला असून भूसंपादन त्वरित करण्याच्या सूचना मुख्यमंत्र्यांनी दिल्या आहेत.
अकोल्यातील शिवणी विमानतळाच्या भूसंपादनाचा आढावा मुख्यमंत्र्यांनी मुंबईमध्ये घेतला. या बैठकीत आमदार रणधीर सावरकर उपस्थित होते. विमानतळाच्या भूसंपादनाच्या विषयात येणाऱ्या अडचणी समजून घेत तत्काळ याबाबत आवश्यक उपाययोजना करण्याचे निर्देश मुख्यमंत्र्यांनी संबंधित अधिकाऱ्यांना दिले आहेत.
१९४३ मध्ये शिवणी विमानतळाची उभारणी करण्यात आली आहे. विमानतळाच्या १४०० मीटर लांबीच्या धावपट्टीचा विस्तार १८०० मीटर करण्याचे प्रस्तावित आहे. आठ वर्षांपूर्वी कृषी विद्यापीठाच्या मालकीची ६०.६८ हेक्टर जमीन विमानतळ प्राधिकरणाच्या ताब्यात देण्यात आली. धावपट्टीच्या विस्तारासाठी आणखी २२.२४ हेक्टर खासगी भूसंपादनाची आवश्यकता आहे. त्या जमिनीशिवाय विमानतळाचा विकास शक्य नसल्याचे भारतीय विमानपत्तन प्राधिकरणने स्पष्ट केले. जमीन अधिग्रहणासाठी सुमारे ८४ कोटींचा प्रस्ताव जिल्हा प्रशासनाने राज्य शासनाच्या सामान्य प्रशासन विभागाकडे २०१८-१९ मध्ये पाठवला होता. त्याची फाईल मंत्रालयात धुळखात पडून राहिली. दरम्यान, राज्य शासनाच्या पर्यटन उत्पादन शुल्क नागरी विमान वाहतुकीचे प्रधान सचिवांनी २५ जुलै २०२२ ला जिल्हा प्रशासनाला पत्र पाठवून शिवणी विमानतळाच्या भूसंपादनासाठी लागणारी अंदाजीत रक्कम कळविण्याच्या सूचना दिल्या. त्यानुसार आवश्यक २२.२४ हेक्टर जमिनीसाठी २०२२-२३ च्या शिघ्र सिद्ध गणकानुसार १६६ कोटी ६४ लाख ४० हजार रुपये भूसंपादनासाठी लागणार असल्याचा प्रस्ताव दिला. भूसंपादनाच्या निधीमध्ये दुप्पटीने वाढ झाली. विमानतळासाठी लागणाऱ्या जमिनीची किंमत आता २०० कोटीपेक्षा अधिक झाली आहे.
अर्थसंकल्प सादर करतांना उपमुख्यमंत्री अजित पवार यांनी शिवणी विमानतळाच्या विस्तारीकरणासाठी निधी देण्याचे आश्वासन दिले. अमरावती विमानतळाच्या लोकार्पण कार्यक्रम व अकोल्यातील विकास संवाद सभेत मुख्यमंत्री देवेंद्र फडणवीस यांनी अकोल्यातील विमानतळाचे विस्तारीकरणाचा प्रश्न मार्गी लावण्याचे सूतोवाच केले. मुख्यमंत्र्यांनी मुंबईत बैठक घेऊन अधिकाऱ्यांना भूसंपादन करण्याच्या सूचना दिल्या आहेत.
अकोलेकरांच्या आशा पल्लवित
भूसंपादनाअभावी शिवणी विमानतळाच्या धावपट्टीचा विस्तार झालेला नाही. केंद्र शासनाच्या महत्त्वाकांक्षी ‘उडान’ योजनेंतर्गत शिवणी विमानतळावरून हवाईसेवा सुरू करण्याच्या दृष्टीने खासदार अनुप धोत्रे यांनी केंद्रीय नागरी हवाई वाहतूक मंत्रालयाकडे प्रस्ताव सादर केला. आता मुख्यमंत्र्यांनी धावपट्टी विस्तारात पुढाकार घेतल्याने शिवणी विमानतळ सुरू होण्यासंदर्भात अकोलेकरांच्या आशा पल्लवित झाल्या आहेत.
