नागपूर प्रन्यासवर अमरावतीच्या आमदाराची नियुक्ती?

नागपूर शहराच्या विकासासाठी दोन विकास यंत्रणा आहे, एक महापालिका व दुसरी नागपूर सुधार प्रन्यास. सुधार प्रन्यासचे कामकाज विश्वस्त मंडळाच्या माध्यमातून चालते. त्याचे अध्यक्ष प्रन्यासचे सभापती अर्थात आयएएस अधिकारी असतो तर अन्य विश्वस्तांमध्ये शहरातील आमदारांचा प्रतिनिधी, महापालिकैतील लोकप्रतिनिधींचे प्रतिनिधी असे एकूण दहा विश्वस्त असतात. काही अशासकीय सदस्य असतात त्यांची नियुक्ती राज्य शासनाच्या माध्यमातून केली जाते.

या नियुक्त्या राजकीय असतात. सत्ताधारी पक्ष त्यांच्या नेत्यांना या मंडळावर संधी देत असते. सध्या राज्यात महायुतीची सत्ता आहे. राष्ट्रवादी अजित पवार गट हा त्यातील घटक पक्ष आहे. या तीनही पक्षात लाभाचे पद वाटणी केली जात आहे. सुत्रांनी दिलेल्या माहितीनुसार नासुप्रचे एक विश्वस्तपद राष्ट्रवादीच्या वाट्याला आले आहे. त्यामुळे स्थानिक नेत्यांना पक्ष संधी देईल अशी अपेक्षा होती. नागपुरात अजित पवार गटाचे प्राबल्य नाही, एकहीआमदार सुद्धा नाही.

एक माजी नगरसेवक सुद्धा नाही. त्यामुळे विस्वस्तपद द्यायचे कोणाला असा प्रश्न पक्षापुढे निर्माण झाला. त्यातून अमरावतीच्या आमदार सुलभा खोडके यांचे नाव पुढे आले व त्यांच्या नावाची शिफारस विश्वस्तपदासाठी करण्यात आल्याची चर्चा राष्ट्रवादीच्याच या पदासाठी इच्छुक असलेल्या नेत्यांनी सुरू केली. बाहेरच्या म्हणजे अमरावतीच्या लोकप्रतिनिधीला नागपूरच्या माथी मारू नये, अशा तक्रारी करणे सुरू झाले आहे. सुत्रांनी दिलेल्या माहितीनुसार प्रफुल्ल पटेल यांच्याकडेही तक्रार करण्यात आल्याची माहिती आहे. अद्याप खोडके यांची अधिकृत नियुक्ती जाहीर झाली नाही, पण ती झाल्यास राष्ट्रवादी काँग्रेसमध्ये असंतोष भडकण्याची शक्यता वर्तवली जात आहे.