नागपूर : राज्याची उपराजधानी असलेले नागपूर शहर मुख्यमंत्री देवेंद्र फडणवीस यांचेही शहर आहे. भौगोलिक दृष्ट्या देशाचे केंद्र बिंदू असलेले हे शहर वाघांच्या अधिवासामुळेहे टायगर कॅपिटल म्हणून ओळखले जाते. मात्र याच नागपूरची आता महिलांच्या बाबतीत सर्वांत असुरक्षित शहर म्हणूनही गणना होत आहे. सार्वजनिक स्थळी महिलांना उद्देषून अश्लिल शेरेबाजी करण्यात संत्रानगरीने अव्वल स्थान गाठले आहे.
नॅशनल क्राइम रेकॉर्ड ब्युरोने (एनसीआरबी) प्रकाशित अहवालातून ही माहिती उजेडात आली आहे. सार्वजनिक ठिकाणी अश्लील कृत्ये, शेरेबाजी, शिवीगाळ व द्विअर्थी गाणी म्हटल्याबद्दल नागपुरात देशात सर्वाधिक गुन्हे नोंदविण्यात आल्याची माहिती एनसीआरबीने दिलेल्या अहवालातून चव्हाट्यावर आणली आहे.
नॅशनल क्राइम रेकॉर्ड ब्युरोने (एनसीआरबी) प्रकाशित अहवालातून ही माहिती उजेडात आली आहे. एनसीआरबीच्या आकड्यानुसार २०२३ या वर्षात अश्लील कृत्ये व गाणी म्हटल्या बद्दल पूर्वीच्या भारतीय दंड विधानाच्या २९४ आणि आताच्या बीएनएस २९६ कलमाअंतर्गत सर्वाधिक साडेपाचशेहून अधिक गुन्हे नागपुरात नोंदवले गेले. यादीत दुसऱ्या क्रमांकावर शेजारील राज्य असलेल्या मध्य प्रदेशातील इंदूरमध्ये तुलनेत कमी गुन्हे दाखल झाले.
पहिल्या क्रमांकाचे नागपूर आणि दुसऱ्या क्रमांकावरील इंदूर यांच्यात तब्बल चार शतकांच्या गुन्ह्यांचे अंतर आहे. उत्तर प्रदेशातील कानपूर ९७ गुन्ह्यांसह तिसऱ्या, केरळमधील कोची ८५ गुन्ह्यांसह चौथ्या तर केरळमधील कोझीकोड ५० गुन्ह्यांसह पाचव्या स्थानी आहे. महाराष्ट्राची राजधानी मुंबईत भादंविच्या ‘कलम २९४’अंतर्गत केवळ ४८ गुन्ह्यांची नोंद करण्यात आली, हे विशेष. २०२३मध्ये देशभरात या कलमांतर्गत एक हजार ६३ गुन्हे दाखल करण्यात आले.
एखाद्याने दुसऱ्याला शिवीगाळ करणे, त्याच्यासमोर अश्लील कृत्य करणे अथवा अश्लील गाणी म्हटल्याने हा गुन्हा दाखल होत नाही. सार्वजनिक ठिकाणी अथवा तिसऱ्याला वाटले, की पहिल्याला किंवा दुसऱ्याला त्रास झाला तरच हा गुन्हा दाखल होऊ शकतो, असे पोलिसांनी सांगितले.
तर होऊ शकते शिक्षा आणि दंड
सार्वजनिक ठिकाणी एखाद्याची आक्षेपार्ह कृती अथवा शेरेबाजीबद्दल जर कोणी पोलिसांत लेखी तक्रार केली आणि गुन्हा दाखल करायचा आहे, असे कळवले तर पोलीस कायदेशीर कारवाई करतात. तक्रारदाराने तसा पोलिसांवर दबाव आणला तर आताच्या ‘बीएनएसच्या २९६’ या कलमान्वये गुन्हे दाखल केले जातात. प्रत्यक्षात हा गुन्हा न्यायालयात सिद्ध करणे आव्हान असते. भारतीय न्याय संहितेच्या ‘ कलम २९४ ’नुसार, सार्वजनिक ठिकाणी अश्लील शेरेबाजी, अश्लील कृत्ये करणे किंवा अश्लील गाणी म्हणणे हा गुन्हा आहे. हा गुन्हा सिद्ध झाल्यास तीन महिन्यांपर्यंतचा कारावास किंवा दंड किंवा दोन्ही शिक्षा होऊ शकतात. या कलमांतर्गत एक हजार रुपयांपर्यंत दंडही होऊ शकतो.
