वर्धा : पोलीस खात्यात नोकरी लागली की पाहायला नको, असा प्रवाद आहे. मात्र पोलीस व त्यांचे कुटुंब या सेवेत कसे आयुष्य काढतात, याची जाणीव, ‘ जावे त्यांच्या वंशा, तेव्हा कळे ‘ असेच म्हणावे लागेल. २४ × ७ अशी ही सेवा विविध कामे असल्याने अत्यंत जिकिरीची ठरते. गृह राज्यमंत्री डॉ. पंकज राजेश भोयर यांनी हे हेरून राज्यातील विविध जिल्ह्यास भेटी देतांना या समस्या जाणून घेण्याचा प्रयत्न सुरू केला. आणि एक उपक्रम अंमलात आणण्याचा निर्णय घेतला .
सामान्य नागरिकांसोबतच शासनाच्या विविध विभागात कार्यरत असलेल्या कर्मचाऱ्यांना सोयीसुविधा देण्यासाठी राज्याचे गृह राज्यमंत्री डॉ. भोयर प्रयत्नशील असल्याचे त्यांचे सहकारी सांगतात. त्यांच्या प्रयत्नामुळे आता पोलिस विभागातील अधिकारी, कर्मचारी व पोलिस पाटलांच्या पाल्यांना मुख्यमंत्री अल्पकालीन अभ्याक्रमांतर्गत शासकीय औद्योगिक प्रशिक्षण संस्थेमार्फत उद्योगासाठी आवश्यक असलेले प्रशिक्षण दिल्या जाणार आहे.
गृह राज्यमंत्री तथा वर्धा व भंडारा जिल्ह्याचे पालकमंत्री डॉ. पंकज भोयर यांनी पोलीस विभागातील अधिकारी व कर्मचाऱ्यांच्या कुटूंबियांच्या समस्या जाणून घेण्याचा उपक्रम संपूर्ण राज्यात सुरू केला आहे. आता त्यांनी पोलीस अधिकारी, कर्मचारी व पोलीस पाटलांच्या पाल्यांना रोजगारभिमुख शिक्षण देण्यासाठी पुढाकार घेतला आहे. राज्याचे कौशल्य विकास, उद्योजकता व नाविण्यता मंत्री मंगलप्रभात लोढा यांच्याशी चर्चा झाली. त्यात या उपक्रमास मूर्त स्वरूप मिळाले.
मुख्यमंत्री अल्पकालीन अभ्याक्रम योजनेमध्ये या शासकीय वर्गाचा समावेश करण्याची मागणी केली होती. सदर योजना कौशल्य विकास विभागाच्यावतीने शासकीय औद्योगिक प्रशिक्षण संस्थेमार्फत चालविण्यात येत आहे. या योजनेत पोलीस अधिकारी, कर्मचारी व पोलीस पाटलांच्या पाल्यांचा समावेश करून त्यांना रोजगारभिमुख प्रशिक्षण दिल्यास त्यांची आर्थिक क्षमता उन्नत होईल व स्वंयरोजगारसाठी मार्गदर्शन मिळेल. पोलीस कुटुंबास पण आर्थिक सुरक्षा मिळावी, घरीच लघु उद्योग सूरू करीत छोटा व्यवसाय सूरू करता यावा व पाल्यांना काम मिळावे असे ठरले.
गृह राज्यमंत्री डॉ. पंकज भोयर यांनी मांडलेल्या संकल्पनेस कौशल्य, रोजगार, उदयोजकता विकास मंत्री मंगलप्रभात लोढा यांनी दाद देत मुख्यमंत्री अल्पकालीन अभ्यासक्रम योजनेमध्ये पोलीस अधिकारी, कर्मचारी व पोलीस पाटलांच्या पाल्यांचा समावेश केला आहे.
शासकीय औद्योगिक संसथेचे प्राचार्य व निर्देशक संबंधित पोलीस आयुक्त,पोलीस अधीक्षक कार्यालय,पोलीस स्टेशन, एसडीपीओ कार्यालयाशी संपर्क करून योजनेची सर्व ती माहिती देतील. तसेच इच्छुकांची नाव नोंदणी करतील,असे सांगण्यात आले आहे. या संदर्भात गृह विभागाकडून देखील संबंधितांना सूचना देण्यात याव्या, तसेच प्रत्येक पोलिस स्टेशन व महसूल विभाग निहाय एक समन्वयक नियुक्त करण्याची सूचना केली आहे. गृह राज्यमंत्री डॉ. पंकज भोयर यांनी मुख्यमंत्री अल्पकालीन अभ्याक्रम योजनेमध्ये पोलीस अधिकारी, कर्मचारी व पोलीस पाटलांच्या पाल्यांचा समावेश केल्याबद्दल मुख्यमंत्री देवेंद्र फडणवीस व कौशल्य, रोजगार मंत्री मंगलप्रभात लोढा यांचे आभार मानले आहे.
