महिला आरटीओ अधिकाऱ्याच्या निलंबनाचा प्रस्ताव धूळखात!

कांद्री तपासणी नाक्यावर ४ मे २०२३ रोजी एका खासगी वाहनाला तपासणी न करता जाऊ देण्यासाठी लाचेची मागणी करण्यात आली होती. वाहनधारकाने एसीबीकडे तक्रार केल्यावर तेथे सापळा रचून काही खासगी व्यक्तींना लाच घेताना पकडले गेले. आरोपींनी गीता शेजवळांसाठी लाच घेतल्याचे सांगितले. परंतु येथे शेजवळ आढळल्या नाहीत. त्यावर आरोपींनी शेजवळांनी पळ काढल्याचे सांगितले.

हेही वाचा… दुसरीपर्यंतची शाळा सकाळी नऊनंतरच !शिक्षणमंत्र्यांची घोषणा, पुढील शैक्षणिक वर्षापासून अंमलबजावणी

दरम्यान, लाचलुचपत प्रतिबंध विभागाने त्यांच्या स्तरावर चौकशी करून नागपूरच्या प्रादेशिक परिवहन विभागाला शेजवळ यांना निलंबित करण्याबाबत पत्र दिले होते. त्यावरून नागपूर कार्यालयाने राज्याच्या परिवहन खात्याला निलंबनाचा प्रस्ताव पाठवला. परंतु अद्यापही त्याला मंजुरी मिळालेली नाही. शेजवळ या वारंवार त्यांना मुख्यमंत्री एकनाथ शिंदे यांचे पाठबळ असल्याचा दावा आपल्या वरिष्ठांसमोर करीत असल्याची तक्रार आहे. त्यामुळे त्यांचे निलंबन न होण्यामागे मुख्यमंत्री कार्यालयाचा हस्तक्षेप तर नाही ना, असा प्रश्न महाराष्ट्र प्रदेश काँग्रेस कमेटीने परिवहन आयुक्त विवेक भिमनवार यांना १८ डिसेंबरला निवेदनाद्वारे केला आहे. या विषयावर परिवहन आयुक्त विवेक भिमनवार यांच्याशी भ्रमणध्वनीवर संपर्क साधला असता त्यांनी बैठकीत व्यस्त असल्याचे सांगत नंतर बोलणार असल्याचे सांगितले.