नाशिक : आधारकार्डचा वापर करून वेगवेगळ्या राज्यात बँक खाती उघडून साडेआठ कोटी रुपयांचे अनधिकृत व्यवहार झाल्या प्रकरणी गुन्हा दाखल झाल्याची बतावणी करत सायबर गुन्हेगारांनी सीबीआयचा अधिकारी असल्याचे भासवत चौकशीच्या नावाखाली शहरातील एकाकडून सुमारे ५० लाखांची खंडणी उकळल्याची धक्कादायक बाब उघड झाली आहे.
संशयितांनी आर्थिक गैरव्यवहार, अमली पदार्थ तस्करी आणि हवाला असे गंभीर गुन्हे असल्याचे धमकावत चौकशीच्या नावाखाली तक्रारदाराच्या बँक खात्यातील सर्व रक्कम अन्य खात्यांमध्ये वर्ग करण्यास भाग पाडले. १४ ते २० मे या कालावधीत हा प्रकार घडल्याचे तक्रारदाराने म्हटले आहे. संशयितांनी व्हॉट्सॲपवरून तक्रारदाराशी संपर्क साधला. सीबीआय, मुंबई विभागातून पोलीस अधिकारी मोहनदास बोलत असल्याचे भासवले. तक्रारदाराच्या आधारकार्डचा वापर विविध राज्यात बँकेत खाते उघडण्यासाठी केला गेला, या खात्यांतून साडेआठ कोटींचे अनधिकृत व्यवहार झाले. या संदर्भात गुन्हा दाखल असल्याची खोटी माहिती दिली.
सीबीआयचे बोधचिन्ह असणारे पत्र तक्रारदाराला पाठविले. त्यात तक्रारदाराचे नाव, आधारकार्ड क्रमांकाचा वापर करून त्यांच्याविरुद्ध आर्थिक गैरव्यवहार, अमली पदार्थ तस्करी आणि हवाला या स्वरुपाचे गुन्हे दाखल असल्याची धमकी दिली. चौकशीच्या नावाखाली तक्रारदाराच्या दोन्ही बँक खात्यातील सर्व रक्कम विशिष्ट बँक खात्यात वर्ग करण्यास सांगितले. हे पैसे न भरल्यास तक्रारदारासह त्याच्या कुटुंबाला धोका असल्याची खोटी माहिती दिली. संशयितांनी विशिष्ट बँक खात्यांमध्ये ४७ लाख ८७ हजार ५०० रुपये भरण्यास भाग पाडल्याचे तक्रारीत म्हटले आहे. या प्रकरणी सायबर पोलीस ठाण्यात खंडणी उकळल्याप्रकरणी भ्रमणध्वनीधारक, बँक खातेधारक आणि त्यांच्यात समन्वय ठेवणारी व्यक्ती यांच्याविरुद्ध गुन्हा दाखल करण्यात आला आहे. दरम्यान, यापूर्वी सीबीआयचा अधिकारी असल्याचे सांगून फसवणुकीचे प्रकार घडले आहेत.
