नाशिक – मनमाडजवळील ऑईल कंपनीच्या डेपोतून इंधन वितरित करणाऱ्या एका टँकरमधील इंधन चोरीचा प्रकार उघड झाला होता. या पार्श्वभूमिवर, वाहतूकदारांच्या अन्य टँकरची नियमित कडक तपासणी करण्याची मागणी नाशिक जिल्हा पेट्रोल डिलर्स वेल्फेअर असोसिएशनने कंपन्यांकडे केली आहे. यात हलगर्जीपणा झाल्यास आंदोलन छेडण्याचा इशारा संघटनेने दिला आहे.
मनमाड हे तिन्ही सरकारी ऑइल कंपनीच्या डेपोमुळे आर्थिक उलाढालीचे केंद्र झाले आहे. या ठिकाणी दैनंदिन कोट्यवधींची उलाढाल होत असते. मात्र त्यास टँकरमधून होणाऱ्या इंधन चोरीचे गालबोट लागले. या चोरीची झळ मुख्यत्वे पेट्रोल पंपचालकांना बसते. साधारणत: तीन महिन्यापूर्वी तिन्ही ऑइल कंपन्यांचे अधिकारी, वितरक आणि संघटनांचे प्रतिनिधी यांची मनमाड येथील उपविभागीय पोलीस अधिकारी यांच्या कार्यालयात बैठक झाली होती. या बैठकीत ऑइल कंपन्यांच्या अधिकाऱ्यांनी अशा वाहतूकदारांवर कठोर कारवाई करण्याचे आश्वासन दिले होते. मात्र वारंवार अशा घटना घडताना दिसत असल्याकडे संघटनेने लक्ष वेधले.
एका नव्या वितरकाला टँकरमधून दरवेळी सुमारे २०० ते ४०० लिटर डिझेल कमी येत असल्याचे लक्षात आले. पण त्याचे कारण सापडत नव्हते. कंपनीने सांगितलेल्या प्रक्रियेनुसार तपासणी केल्यावर सर्व काही नीट भरायचे. मात्र टँकर खाली केल्यानंतर तो २५० ते ४०० लिटर कमी भरत असे. कंपनीकडे वारंवार याची तक्रार केली. एका वाहतूकदाराचा संशय आला. अन्य वितरकांना या वाहतूकदाराचा असा अनुभव आला होता.
संबंधित टँकर पंपावर आला असता कंपनी अधिकाऱ्यांना बोलावून घेण्यात आले. ते देखील तातडीने हजर झाले. टँकरची तपासणी केली असता एक अनधिकृत पाईप टँकरमधून चालकाच्या कक्षात गेलेला आढळला. या पाईपला बाहेरून वायरचे आवरण लावलेले होते. त्याचे तोंड चालकाच्या कक्षाकडे काढलेले होते. या तपासणीनंतर त्या टँकरवर ऑइल कंपनीने कठोर कारवाई केली. त्याला बंद केल्याचे समजते.
या घटनाक्रमानंतर संघटनेने ऑईल कंपनीला पत्र लिहून याच पद्धतीने वाहतूकदारांच्या अन्य टँकरची नियमित चौकशी करण्याचा आग्रह धरला आहे. ऑइल कंपनीकडून हलगर्जीपणा झाल्यास वितरक संघटनेला आंदोलनाचा मार्ग स्वीकारावा लागेल. – विजय ठाकरे (अध्यक्ष, नाशिक जिल्हा पेट्रोल डीलर्स वेल्फेअर असोसिएशन).
