धुळे : अवैध दारू वाहतूक करणाऱ्याने आज उत्पादन शुल्क निरीक्षकाच्या वाहनाला धडक देत नाकाबंदीवरील पोलिसाच्याही अंगावर गाडी घातली. याचवेळी खोटे सोने देऊन फसवणूक करणाऱ्या टोळीला पोलिसांनी रंगेहात पकडले.
आगामी निवडणुकांच्या निमित्ताने जिल्ह्यात गुन्हेगारी कारवायांवर पोलीसांनी आता कडक नजर ठेवली आहे. दोन वेगवेगळ्या धडक कारवायांमुळे पुन्हा एकदा पोलिसांच्या दक्षतेचे प्रत्यंतर आले आहे. स्थानिक गुन्हे शाखेच्या (एलसीबी) पथकाने जामदा परिसरात खोटे सोने देऊन फसवणूक करणाऱ्या टोळीला रंगेहात पकडले. या टोळीने बनावट सोन्याच्या व्यवहाराद्वारे नागरिकांची लाखो रुपयांची फसवणूक केल्याची शक्यता पोलिसांनी व्यक्त केली असून, आरोपींकडून सोन्याच्या स्वरूपातील बनावट दागिने व रोकड जप्त करण्यात आली आहे.
दरम्यान, दुसऱ्या घटनेत अवैध दारू वाहतूक करणारा प्रदीप नावनाथसिंग गिरासे रा. पळासनेर (ता. शिरपूर) याने उत्पादन शुल्क निरीक्षक नेहुल यांच्या वाहनाला धडक देत चिमठाणे (ता. शिंदखेडा) येथील नाकाबंदीवरील पोलिस अंमलदार पवार यांच्या अंगावरच गाडी घालून पळून जाण्याचा प्रयत्न केला. मात्र, दराणे फाटा (ता. शिंदखेडा) येथे पूनमसिंग गिरासे व इतर सहा-सात नागरिकांनी त्याला पकडण्याचा प्रयत्न केल्यावर आरोपीने त्यांच्या अंगावरसुद्धा गाडी घातली. अखेर पोलिसांनी त्याला ताब्यात घेतलेच. तपासादरम्यान वाहनातून ४४ खोके विदेशी मद्य मिळून आले. याप्रकरणी पोलिसांनी कारवाई सुरू केली आहे.
धुळे जिल्ह्यात यापूर्वीही अवैध मद्य, खोटे सोने व ऑनलाइन फसवणूकप्रकरणी अनेक गुन्हे उघड झाले आहेत. एलसीबी आणि स्थानिक पोलिसांच्या सततच्या गस्तीद्वारे गुन्हेगारी कारवाया रोखण्याचे प्रयत्न सुरू आहेत. जिल्ह्यातील सीमाभागातून मद्यतस्करीचे प्रमाण वाढत असल्याने पोलिसांनी तपासणी नाकाबंदी अधिक कडक केली आहे. पोलिस अधीक्षक श्रीकांत धिवरे यांच्या मार्गदर्शनाखाली दोन्ही कारवाया पार पडल्या असून, आरोपींवर संबंधित कलमानुसार गुन्हे दाखल करण्याची प्रक्रिया सुरू करण्यात आली आहे.
गेल्या काही महिन्यांपासून धुळे, शिरपूर, साक्री परिसरात बनावट सोन्याच्या व्यवहारांचे प्रकार वाढले आहेत. बाहेरील जिल्ह्यांतील काही टोळ्या सोनेविक्रीच्या बहाण्याने ग्रामीण भागात जाऊन नागरिकांची फसवणूक करत असल्याचे समोर आले आहे. त्यामुळे पोलिसांनी नागरिकांना अशा व्यवहारांपासून सावध राहण्याचे आवाहन केले आहे.
अवैध दारू तस्करीच्या प्रकरणात अटक केलेल्या आरोपीकडून आणखी काही मोठ्या नेटवर्कचा तपास सुरू असून, या प्रकरणात अन्य राज्यांतील दारू पुरवठादारांचा सहभाग असल्याचा संशय आहे. पोलिसांनी या कारवाईनंतर मद्याच्या वाहतुकीसाठी वापरलेल्या वाहनाचा पंचनामा करून, आरोपीविरुद्ध गुन्हा दाखल करण्यासाठी आवश्यक कार्यवाही सुरू केली आहे.
