धुळे : शहरातील विश्वकर्मा नगर परिसरात एका अडीच वर्षीय चिमुकलीसोबत लैंगिक छेडछाड केल्याच्या संशयावरून एका ऐंशी वर्षीय वृद्धाला पोलिसांनी ताब्यात घेतले आहे. या संतापजनक घटनेने परिसरात मोठी खळबळ उडाली असून नागरिकांमध्ये तीव्र रोषाचे वातावरण निर्माण झाले आहे.
विश्वकर्मा नगर परिसरात राहणाऱ्या नागरिकांनी ११२ या पोलिस हेल्पलाइनवर एका वृद्ध व्यक्तीने लहान मुलीशी गैरवर्तन केल्याची माहिती दिली होती. माहिती मिळताच चाळीसगाव रोड पोलीस ठाण्याचे पथक तात्काळ घटनास्थळी दाखल झाले. मात्र पोलिस येण्यापूर्वीच परिसरातील नागरिकांनी त्या चिमुकलीची सुटका करून संशयित वृद्धाला पकडून ठेवले होते. त्यानंतर पोलिसांनी त्याला ताब्यात घेतले आणि पीडित मुलीच्या कुटुंबीयांकडून तक्रार नोंदवून घेतली.
चाळीसगाव रोड पोलीस ठाण्याचे निरीक्षक सुरेशकुमार घुसर म्हणाले, “घटनेची माहिती मिळताच आमचे पथक तात्काळ घटनास्थळी पोहोचले. नागरिकांच्या सतर्कतेमुळे पीडित मुलीची सुटका वेळेत झाली. आरोपीला ताब्यात घेऊन पुढील तपास सुरू आहे. बालसुरक्षेसाठी जनजागृती आवश्यक असून अशा प्रकरणांवर कठोर कारवाई केली जाईल.” या प्रकरणी संशयित वृद्धावर भारतीय न्याय संहिता कलम ७५(१) तसेच बाललैंगिक अत्याचार प्रतिबंधक कायदा (पोक्सो) कलम ८ आणि १२ अंतर्गत गुन्हा दाखल करण्याची प्रक्रिया सुरू करण्यात आली आहे. पोलिसांनी सांगितले की, प्राथमिक चौकशीनंतर पुरावे गोळा करून लवकरच न्यायालयात दोषारोपपत्र दाखल केले जाईल.
धुळे जिल्ह्यात अलीकडच्या काळात अल्पवयीन मुलींच्या छेडछाडीच्या काही घटना घडल्याने पालकांमध्ये भीतीचे वातावरण आहे. अशा प्रकारांना आळा घालण्यासाठी पोलिसांनी शाळा व वस्त्यांमध्ये जनजागृती मोहीम सुरू केली आहे. दरम्यान, आपल्या मुलांवर लक्ष ठेवावे, त्यांच्या दैनंदिन हालचाली व संपर्कांवर सतत नजर ठेवावी. मुलांनी काही संशयास्पद प्रसंग सांगितल्यास त्याकडे दुर्लक्ष न करता तात्काळ पोलिसांशी संपर्क साधावा असे आवाहन पुन्हा या निमित्त पोलिसांनी पालकांना उद्देशून केले आहे. समाजातील प्रत्येक नागरिकाने बालकांच्या सुरक्षेसाठी जबाबदारीची भावना ठेवून पुढाकार घेतल्यास अशा गुन्ह्यांना आळा घालणे शक्य असल्याचे पोलिसांचे म्हणणे आहे.
