संकलित मूल्यमापन चाचणी परीक्षेत यंदाही प्रश्नपत्रिका संच तुटवड्याची समस्या

मराठी आणि गणित या दोन विषयांच्या परीक्षांना बहुसंख्य शाळांमध्ये विद्यार्थी संख्येनुसार प्रश्नपत्रिका संच उपलब्ध झाले नाहीत.

Written by लोकसत्ता टीम

नाशिक

October 12, 2025 09:36 IST

scert pat exam 1 nasik paper shortage marathi math exam

संकलित मूल्यमापन चाचणी परीक्षेत यंदाही प्रश्नपत्रिका संच तुटवड्याची समस्या (छायाचित्र:लोकसत्ता टीम)

नाशिक : राज्य शैक्षणिक संशोधन व प्रशिक्षण परिषदेच्या वतीने घेण्यात येणाऱ्या संकलित मूल्यमापन चाचणी-१ (पॅट) परीक्षेस जिल्ह्यात सुरूवात झाली असून पहिली ते आठवी इयत्तेतील विद्यार्थ्यांसाठी असलेल्या या उपक्रमात मराठी आणि गणित या दोन विषयांची परीक्षा झाली असून इंग्रजीची चाचणी १३ ऑक्टोबर रोजी होणार आहे. मराठी आणि गणित या दोन विषयांच्या परीक्षांना बहुसंख्य शाळांमध्ये विद्यार्थी संख्येनुसार प्रश्नपत्रिका संच उपलब्ध झाले नाहीत.

गेल्या शैक्षणिक वर्षी पॅट परीक्षा एप्रिलमध्ये घेण्याच्या नियोजनावरून एससीईआरटीवर प्रचंड टीका झाली होती. शाळांचा अधिकार थेट परिषदेने घेतल्याने अनेकांनी नाराजी व्यक्त केली होती. यंदा तो अनुभव लक्षात घेऊन शाळांना सहामाही परीक्षांच्या वेळापत्रकाबाबत पूर्ण स्वातंत्र्य देण्यात आले आहे. पॅट परीक्षा ही दहावी-बारावीप्रमाणे उच्चस्तरीय नसून, विद्यार्थ्यांची शैक्षणिक प्रगती आणि अध्ययनातील अडथळे ओळखण्यासाठीची साधने असल्याचे स्पष्टीकरण एससीईआरटीने दिले आहे. या चाचणीच्या प्रश्नपत्रिका पाच ऑक्टोबर रोजी जिल्हास्तरावर वितरित केल्या गेल्या. गटशिक्षणाधिकारी, प्रशासन अधिकारी आणि तालुका समन्वयक यांच्या देखरेखीखाली प्रश्नपत्रिका थेट शाळांपर्यंत पोहोचवल्या गेल्या.

मात्र अनेक शाळांना त्या मिळाल्या नसल्याच्या तक्रारी कायम आहेत. बहुसंख्य महाविद्यालयांमध्ये मराठी माध्यमाच्या ३५ टक्के कमी तर सेमी इंग्रजी माध्यमाची एकही प्रश्नपत्रिका मिळाली नाही. असाच प्रकार मागील परीक्षेवेळी घडला होता. त्यामुळे मागील आणि यावेळीही ज्यांना प्रश्नपत्रिका मिळाल्या नाहीत, अशा विद्यार्थ्यांच्या परीक्षा घेतल्या जाणार नाहीत. तसेच उर्वरित विद्यार्थ्यांच्या प्रश्नपत्रिका संस्थेच्या प्रिंटिंग प्रेसकडून छापून घेऊन दिवाळीनंतर परीक्षा घेतल्या जातील.

याविषयी खासगी प्राथमिक शिक्षक संघाचे अध्यक्ष नंदलाल धांडे यांनी माहिती दिली. संकलित मूल्यमापन एक या परीक्षेसंदर्भात नेहमीच शिक्षण विभागाचा गोंधळ होत असतो. शाळा व शिक्षक विद्यार्थी वाढविण्यासाठी प्रयत्न करीत असतात. त्या मुलांना पेपर पुरवठा होत नाही, ही अत्यंत खेदजनक बाब आहे. व्हाट्सअप ,ई मेल, दूरदृश्य प्रणाली अशी समाज माध्यमे उपलब्ध असताना त्यावर चर्चा होऊन ती आकडेवारी ग्राह्य धरून प्रश्नपत्रिकांचा पुरवठा का होत नाही, अशी अपेक्षा त्यांनी व्यक्त केली.