पुसद शहरातील मुखरे चौकात एका युवकावर अज्ञात व्यक्तींनी गोळ्या झाडल्या. ही घटना आज मंगळवारी दुपारी घडली. विशाल घाटे (२५), रा. पुसद असे गोळीबारात जखमी झालेल्या युवकाचे नाव आहे. या घटनेने पुसद शहरात खळबळ उडाली.विशाल दुचाकीने जात असताना दुचाकीवरून आलेल्या दोन अज्ञात व्यक्तींनी त्याच्यावर गोळीबार केला. एक गोळी थेट त्याच्या कमरेखाली पायात घुसल्याने तो गंभीर जखमी झाला. त्याला खाजगी दवाखान्यात दाखल करण्यात आले. तेथून पुढील उपचारासाठी नांदेड येथे हलवण्यात आले.
हेही वाचा >>>नाशिक: जनलक्ष्मी, समर्थ बँकेसह मविप्र सेवक सोसायटीत सत्ताधारीच विजयी
जुन्या वैमनस्यातून ही घटना घडल्याचा प्राथमिक अंदाज आहे. पोलिसांनी अज्ञात आरोपीविरुद्ध गुन्हा दाखल केला असून आरोपींचा शोध सुरू आहे. पुसद शहरात काही दिवसांपूर्वीसुद्धा गोळीबाराच्या घटना घडल्या आहेत. वाढत्या गुन्हेगारीमुळे नागरिकांमध्ये चिंतेचे वातावरण निर्माण झाले आहे.
